Martin Vulaj: Retorika raciste s’ka vend në një shoqëri evropiane

“Këshilli për Marrëdhënie Shqiptaro-Amerikane (AARC) dënon fuqishëm thirrjet e urryeshme dhe të papranueshme anti-shqiptare të dëgjuara dje në Maqedoninë e Veriut. Retorika e tillë nuk ka vend në një shoqëri demokratike dhe multietnike. Ajo minon parimet e bashkëjetesës, respektit të ndërsjellë dhe vlerave evropiane për të cilat Maqedonia e Veriut aspiron dhe për të cilat shqiptarët kanë luftuar aq shumë.”, shpërndau kumtesën Martin Vulaj.

“Thirrjet që bëjnë apel për futjen e shqiptarëve në dhoma gazi sjellin ndër mend kapitujt më të errët të historisë së Evropës në shekullin XX – një epokë e shënuar nga gjenocidi, çnjerëzimi dhe dështimi katastrofik i njerëzimit. Këto fjalë nuk janë thjesht fyese – ato janë rrëqethëse dhe të rrezikshme.”

“Veçanërisht shqetësues është heshtja e turpshme e liderëve shtetërorë, përfshirë Kryeministrin, të cilët ishin të pranishëm në ndeshje dhe nuk reaguan aspak. Lidershipi nuk matet me praninë fizike, por me kurajën morale – dhe në këtë moment, ajo mungoi plotësisht.”

“Shqiptarët nuk janë një pakicë për t’u ‘toleruar’, por një pjesë integrale dhe historike e strukturës së këtij shteti. Tentativat për të nxitur urrejtje apo përçarje janë një kërcënim për stabilitetin shoqëror dhe duhet të përballen me masa të menjëhershme ligjore dhe institucionale.” Flaka