Studimi: Fillimi i hershëm i duhanit dyfishon rrezikun për infarkt dhe goditje në tru

Mosha në të cilën një person nis pirjen e duhanit ka ndikim shumë më të madh në shëndetin e zemrës sesa vetë vitet e konsumit të duhanit, sugjeron një studim i ri shkencor i publikuar nga studiues nga Koreja e Jugut, raportojnë mediat ndërkombëtare.

Sipas studimit, personat që fillojnë të pijnë duhan para moshës 20-vjeçare përballen me një rrezik dukshëm më të lartë për sulm në zemër dhe goditje në tru, edhe nëse e kanë lënë duhanin prej vitesh. Nisja e hershme e këtij zakoni mund ta dyfishojë rrezikun për sëmundje serioze kardiovaskulare.

Studiuesit nga Spitali Universitar Kombëtar i Seulit kanë analizuar të dhënat shëndetësore të mbi 9 milionë të rriturve dhe kanë zbuluar se individët që kishin filluar pirjen e duhanit para moshës 20-vjeçare kishin rrezik shumë më të lartë për infarkt dhe goditje në tru, krahasuar me ata që kishin filluar pas moshës 30-vjeçare.

“Fillimi i hershëm i pirjes së duhanit lidhet ngushtë me rritjen e rrezikut për infarkt në zemër dhe sulm në tru. Për këtë arsye, masat parandaluese kundër duhanit janë veçanërisht të nevojshme për adoleshentët dhe të rinjtë”, kanë theksuar autorët e studimit në revistën shkencore Nature.

Studimi tregon se edhe pse rreziku rritet me shtimin e viteve të pirjes së duhanit, ai rritet shumë më shpejt te personat që e kanë nisur këtë zakon në moshë të re. Personat që kishin filluar të pijnë duhan para moshës 20-vjeçare dhe kishin mbi 20 “vjet-pako” kishin mbi 2.4 herë më shumë rrezik për sulm në zemër ose në tru.

Në krahasim, ata që kishin filluar pirjen e duhanit pas moshës 30-vjeçare kishin një rrezik dukshëm më të ulët, edhe për të njëjtin nivel konsumi.

Edhe ish-duhanpirësit e rëndë vazhdojnë të mbeten në rrezik më të lartë krahasuar me personat që nuk kanë pirë kurrë duhan. Sipas të dhënave, ata kanë mbi dyfish rrezik për sulm në zemër dhe rreth 80 për qind më shumë rrezik për goditje në tru.

Studiuesit theksojnë se nisja e hershme e duhanit lidhet me varësi më të fortë nga nikotina, dëmtime të hershme të enëve të gjakut dhe procese inflamatore kronike, si dhe me faktorë të tjerë të stilit të jetesës, si mungesa e aktivitetit fizik, obeziteti dhe konsumimi i alkoolit dhe ushqimit të përpunuar.

Flaka