Me sukses u zhvillua “Kupa e Gostivarit në Mërgim 2026” në Zvicër

Me sukses të plotë u realizua turneu tradicional në futboll të vogël “Kupa e Gostivarit në Mërgim 2026”, i cili u mbajt në Wettingen të Zvicrës, nën organizimin e Unionit të Shoqatave Shqiptare të Gostivarit në Mërgim, transmeton Gazeta Flaka

Ky turne përbën një nga ditët më të rëndësishme dhe më festive për mërgatën shqiptare të Gostivarit, duke mbledhur bashkatdhetarë nga Zvicra, Italia, Gjermania, Austria, si dhe nga vendlindja. Për të tretin vit me radhë, ngjarja sportive u ndoq dhe u përjetua me interes të madh nga publiku i gjerë.

Fituesit e turneut për vitin 2026 janë:

• Vendi i parë: Shoqata Tërnova
• Vendi i dytë: Shoqata Humanitare Forina – Zvicër
• Vendi i tretë: Shoqata Xhemil Islami – Raven
• Vendi i katërt: Shoqata Strajani i Bashkuar

Për herë të parë këtë vit u ndanë edhe çmime individuale. Lojtari më i mirë u shpall Sali Fazliu nga Shoqata Tërnova, ndërsa titulli portieri më i mirë i takoi Dashmir Sejfulit nga Shoqata Humanitare Forina – Zvicër.

Organizatorët shprehën falënderime të veçanta për ekipin vullnetar të Unionit të Shoqatave Shqiptare të Gostivarit në Mërgim, për sponsorët dhe sipërmarrësit gostivaras që mbështetën këtë aktivitet, si dhe për 17 shoqatat pjesëmarrëse, të cilat u paraqitën me dinjitet dhe korrektësi.

Një moment i veçantë i turneut ishte prania e ish-futbollistit të mirënjohur dhe ish-kampionit të botës, Shkodran Mustafi, i cili erdhi enkas nga Gjermania për të ndarë çmimin kryesor për fituesin e vendit të parë.

Në turne morën pjesë edhe përfaqësues institucionalë, mes tyre kryetari i Komunës së Gostivarit, Valbon Limani, kryetari i Këshillit Komunal, Valdet Xhaferi, si dhe ambasadori i Maqedonisë së Veriut në Zvicër, Rexhep Demiri, të cilët u nderuan me mirënjohje nga organizatorët.

Në fjalën e tij përshëndetëse, kryetari i Unionit të Shoqatave Shqiptare të Gostivarit në Mërgim, Kasam Selimi, u shpreh se turneu dëshmoi edhe një herë forcën e bashkimit dhe frymën pozitive të mërgatës, duke shpresuar që aktivitete të tilla të vazhdojnë edhe në të ardhmen.

Ky ishte turneu i tretë radhazi i organizuar nga shoqatat e Gostivarit në mërgim, ndërsa fitues i dy edicioneve të mëparshme ka qenë Shoqata Xhemil Islami e fshatit Raven.