A ftoheni nëse dilni jashtë me flokë të lagur?

Dalja jashtë me flokë të lagur është një situatë e njohur për shumë njerëz, veçanërisht gjatë mëngjeseve të nxituara.

Ndërsa disa e shohin këtë si një zgjedhje të parrezikshme, të tjerët besojnë se mund të shkaktojë probleme shëndetësore.

Shumë prej nesh e kemi dëgjuar shprehjen e famshme: Mos dilni jashtë në të ftohtë me flokë të lagur pasi do të ftoheni.

Kjo kryesisht rrjedh nga frika se ftohja e tepërt mund të na sëmurë, shkruan The Washington Post, transmeton telegrafi.

Nuk ka shumë të vërteta për këtë, por mund të mos jetë edhe plotësisht e rreme.

Ftohja e zakonshme, gripi dhe sëmundjet e tjera të frymëmarrjes, përfshirë COVID-19, shkaktohen nga viruset. Disa infeksione të sinuseve shkaktohen nga bakteret. Këto mikrobe zakonisht përhapen nga pikat e frymëmarrjes dhe nga grimcat e njerëzve që janë të sëmurë dhe mund t’i marrim duke prekur sipërfaqet e kontaminuara dhe më pas duke prekur sytë, hundën ose gojën.https://zeri.info/inarticle.html

“Nuk mund të ftohesh vetëm duke dalë në të ftohtë”, tha Sean O’Leary, kryetar i Komitetit për Sëmundjet Infektive për Akademinë Amerikane të Pediatrisë.

Megjithatë, moti i dimrit mund të krijojë një mjedis më të këndshëm për mikrobet – si jashtë ashtu edhe brenda trupit tonë. Disa kërkime kanë sugjeruar se temperaturat e ftohta mund të ndihmojnë virusin e gripit të mbijetojë më mirë.

Temperaturat e ftohta mund të ndikojnë gjithashtu në sistemin tonë imunitar, duke na bërë më të ndjeshëm kur ekspozohemi ndaj mikrobeve.

Pra, nëse i përgjigjemi pyetjes apo shqetësimit paraprak, nuk mund të sëmuremi thjesht duke dalë jashtë në të ftohtë me flokë të lagur; kjo mund të ndodhë nëse kemi kontakt me një virus të ftohjes ose gripit.

Temperaturat e ftohta, megjithatë, mund t’ju bëjnë më të ndjeshëm ndaj një infeksioni kur jeni të ekspozuar ndaj mikrobeve të caktuara.