ASH: Vetëm 12 nga 77 vende pune për shqiptarët në DAP

Të dhënat nga konkursi i fundit i brendshëm në Drejtorinë për të Ardhura Publike, ku nga 77 vende pune të plotësuara vetëm 12 u takojnë shqiptarëve, ngrenë shqetësime serioze për përfaqësimin e drejtë dhe adekuat në këtë institucion.

Sipas të dhënave që disponojmë, i njëjti trend është përsëritur edhe në katër-pesë konkurset e fundit të brendshme gjatë tri viteve të fundit, ku përfaqësimi i shqiptarëve është sjellë vazhdimisht rreth 10–15 për qind.

Gjendje e ngjashme paraqitet edhe në pozitat udhëheqëse. Nga 70 drejtues në DAP, vetëm 9 janë shqiptarë, ndërsa në Drejtorinë Rajonale të Shkupit të dyja pozitat kryesore mbahen nga pjesëtarë të komunitetit maqedonas.

Këto të dhëna kërkojnë transparencë dhe përgjegjësi institucionale. Shfuqizimi i Balancuesit pa vendosjen e menjëhershme të një mekanizmi tjetër efektiv ka krijuar një boshllëk në monitorimin e përfaqësimit të drejtë dhe adekuat.

Arsyetimi se punësimet dhe avancimet nuk bëhen mbi bazë etnike nuk mjafton për të sqaruar një rezultat që, sipas të dhënave të disponueshme, përsëritet në disa konkurse me radhë. Institucionet duhet të publikojnë të dhënat e plota dhe kriteret mbi të cilat janë bërë këto avancime.

Përfaqësimi i drejtë dhe adekuat është parim kushtetues dhe duhet të garantohet në praktikë, në çdo nivel të administratës publike. Prandaj kërkohet përfundimi sa më shpejt i procedurës ligjore dhe vendosja e mekanizmave të qartë, të matshëm dhe transparentë që do të parandalojnë çdo formë të përjashtimit apo pabarazisë në institucionet shtetërore.