Bayern dhe Atlético vendosin vijën e kuqe: Olise dhe Álvarez nuk preken

Sipas raportimeve të fundit, drejtuesit e Bayern Munich nuk kanë asnjë qëllim të shqyrtojnë oferta për Michael Olise, madje edhe nëse ato arrijnë shifrën e 150 milionë eurove. Klubi bavarez e konsideron francezin një pjesë kyçe të projektit të tij afatgjatë dhe nuk dëshiron të hapë negociata për largimin e tij.

Ndërkohë, spekulimet për një ofertë rekord të Real Madridit për Julián Álvarez vazhdojnë të qarkullojnë, por kampi i sulmuesit argjentinas ka refuzuar të komentojë mbi këtë çështje. Përfaqësuesit e lojtarit kanë deklaruar se nuk janë informuar për ndonjë lëvizje zyrtare nga madrilenët.

Presidenti i Real Madridit, Florentino Pérez, deklaroi së fundmi se klubi i tij gjithmonë kontakton fillimisht klubin përkatës përpara se të negociojë me lojtarët, duke lënë të kuptohet se nuk ka ende hapa konkretë në këtë rast.

Nga ana tjetër, Atlético Madrid ka refuzuar një ofertë prej 100 milionë eurosh nga Barcelona për Julián Álvarez, duke bërë të qartë se nuk ka ndërmend të shesë sulmuesin. Mesazhi nga drejtuesit e klubit madrilen është i prerë: “Ne duam ta mbajmë Juliánin”.

Kjo situatë tregon se si dy prej emrave më të kërkuar të merkatos së verës mbeten prioritete absolute për klubet e tyre aktuale, pavarësisht interesimit të madh nga gjigantët europianë.

Flaka