Chivu i përgjigjet Mourinhos para përballjes me Real Madridin: “Nuk përpiqem të kopjoj askënd”

Cristian Chivu ka folur në konferencën për shtyp para sfidës së Champions League kundër Real Madridit, duke iu përgjigjur edhe komenteve të José Mourinhos.

Trajneri i Interit theksoi se nuk dëshiron të kopjojë askënd në mënyrën e tij të drejtimit, ndërsa pranoi rëndësinë që Mourinho ka pasur në karrierën e tij.

“Unë përpiqem të mos kopjoj askënd. Jam një trajner që deri tani e ka fituar eksperiencën e tij duke nisur nga sektori i të rinjve. Mourinho ka qenë një person themelor për karrierën time, më ka ndihmuar edhe në një fazë shumë delikate dhe këtë nuk do ta harroj kurrë”, u shpreh Chivu.

I pyetur për rrugëtimin e Interit në vitet e fundit dhe mundësinë që skuadra të kishte fituar një tjetër trofe të Champions League, Chivu theksoi se kompeticioni më prestigjioz evropian kërkon edhe fat në momentet vendimtare.

“Duhet ta pyesni atë nëse dëshironte që Interi të fitonte një tjetër. Interi ka arritur shumë në vitet e fundit, me tri finale evropiane mes Champions League dhe Europa League. Kanë ardhur edhe humbje, por Champions-i është i paparashikueshëm dhe në momente të caktuara duhet edhe fat. Vetëm të arrish në finale nuk është aspak e lehtë”, deklaroi trajneri zikaltër.

Tashmë vëmendja është te sfida e madhe ndaj Real Madridit, ku Interi do të kërkojë një rezultat pozitiv në një tjetër përballje të rëndësishme evropiane.

Flaka