Denoncimi i Danella Arsovskës çon në bastisje në Çair: Kërkoi transparencë dhe zbatim të ligjit për të gjithë

Kryetarja e Komunës së Shkupit, Danella Arsovska, ka konfirmar që më datë 23 korrik 2025, policia ka ndërmarrë aksion në bazë të urdhrit të Prokurorisë për Ndjekjen e Krimit të Organizuar dhe Korrupsionit si dhe me urdhër të gjykatësit të procedurës paraprake, shkruan Flaka.

“Me urdhër të Prokurorisë për Ndjekjen e Krimit të Organizuar dhe Korrupsionit dhe me urdhër të gjykatësit të procedurës paraprake, më 23.07.2025, zyrtarë policorë nga Sektori për Luftimin e Krimit të Organizuar dhe të Rëndë pranë MPB-së kanë konfiskuar dokumentacion nga Komuna e Çairit dhe nga Ministria e Transportit dhe Lidhjeve,” deklaroi Arsovska.

Ajo shtoi se aksioni është pjesë e një hetimi që lidhet me ndërtimet pa leje dhe dyshimet për shpërdorim të pozitës zyrtare.

“Organi i rendit ka vepruar në përputhje me ligjin dhe nën mbikëqyrje të institucioneve gjyqësore. Ne presim që hetimet të zbardhin përgjegjësinë për këtë rast,” thuhet më tej në reagimin e saj.

Arsovska kërkoi transparencë dhe zbatim të ligjit për të gjithë: “Askush nuk guxon të jetë mbi ligjin.”

Sot, Policia ka ndërhyrë në Komunën e Çairit dhe në Ministrinë e Transportit dhe Lidhjeve, duke konfiskuar dokumentacion zyrtar në kuadër të hetimeve për ndërtimet pa leje në këtë komunë të Shkupit – ka konfirmuar Ministria e Punëve të Brendshme për Televizionin Telma, transmeton Flaka.

Sipas MPB-së, aksioni është ndërmarrë më 23 korrik 2025 me urdhër të Prokurorisë për Ndjekjen e Krimit të Organizuar dhe Korrupsionit dhe të gjykatësit të procedurës paraprake, ndërsa hetimet janë iniciuar pas kallëzimeve të kryetares së Shkupit, Danella Arsovska, e cila ka denoncuar legalizimin e rreth 150 ndërtimeve të paligjshme në Çair.

Ky zhvillim ndodh në një periudhë kur ndërtimet pa leje janë kthyer në çështje të mprehtë politike dhe ligjore në kryeqytet. Flaka