Dieta që lehtëson dhimbjet e artritit

Osteoartriti, forma më e përhapur nga mbi 200 lloje të artritit, prek mbi 20% të popullsisë dhe shkakton dhimbje, ngurtësim dhe vështirësi në lëvizje të artikulacioneve.

Sipas të dhënave mjekësore, aktualisht nuk ekziston një trajtim përfundimtar që e kuron këtë gjendje, por mënyra e jetesës luan rol të rëndësishëm në menaxhimin e simptomave.

Ekspertët theksojnë se humbja e peshës dhe aktiviteti fizik i moderuar janë ndër faktorët më të rëndësishëm për lehtësimin e dhimbjeve, pasi zvogëlojnë ngarkesën mbi nyje dhe ulin inflamacionin në trup.

Ushqyerja gjithashtu ka ndikim të madh. Konsumi i peshkut të yndyrshëm si salmoni, sardelet dhe skumbri, i pasur me omega-3, mund të ndihmojë në uljen e substancave inflamatore që shkaktojnë dhimbje.

Nga ana tjetër, rekomandohet kufizimi i mishit të kuq dhe zëvendësimi i yndyrave shtazore me ato bimore si vaji i ullirit, për të ndihmuar edhe në uljen e kolesterolit, i cili shpesh është i lartë te pacientët me osteoartrit.

Po ashtu, dieta e pasur me fibra, fruta të thata, produkte soje dhe sterole bimore mund të ndihmojë në përmirësimin e shëndetit të përgjithshëm dhe uljen e rrezikut kardiovaskular.

Vitaminat A, C, E dhe K luajnë rol të rëndësishëm në mbrojtjen e indeve dhe shëndetin e kockave, ndërsa vitamina D, e marrë nga dielli, mbetet thelbësore për forcimin e skeletit.

Flaka