Ekspertët zbulojnë djathin më të mirë për një dietë të shëndetshme

Jo të gjithë djathërat kanë të njëjtin ndikim në organizëm. Sipas ekspertëve të ushqyerjes, një nga zgjedhjet më të mira për personat që kujdesen për peshën dhe shëndetin është ricotta, një lloj djathi i ngjashëm me gjizën pa kripë.

Emri i saj vjen nga italishtja dhe do të thotë “e gatuar përsëri”, pasi prodhimi tradicional i ricottës bëhet duke përpunuar hirrën që mbetet pas mpiksjes së qumështit për prodhimin e djathit.

Dietologia Castro Mortillaro shpjegon se ricotta ka një përqendrim të lartë të proteinës së hirrës, e cila përthithet lehtësisht nga trupi dhe përmban një gamë të gjerë aminoacidesh të rëndësishme për organizmin.

Proteina luan një rol kyç në kontrollin e peshës, pasi ndihmon në ndjenjën e ngopjes për një kohë më të gjatë dhe kontribuon në ndërtimin e masës muskulore. Për këtë arsye, djathërat me më shumë proteina dhe më pak yndyrë konsiderohen zgjedhje më të mira për një dietë të ekuilibruar.

Ekspertët vlerësojnë gjithashtu djathërat e fortë si Parmigiano, Pecorino dhe Gouda, të cilët për shkak të përmbajtjes më të ulët të ujit kanë më shumë kalcium dhe konsumohen zakonisht në sasi më të vogla.

Nga ana tjetër, rekomandohet kufizimi i djathërave shumë të përpunuar, si djathi amerikan apo djathi krem, pasi shpesh përmbajnë më shumë yndyrë dhe natrium, ndërsa ofrojnë më pak proteina.

Në një regjim ushqimor të shëndetshëm, ricotta mund të jetë një alternativë e mirë për ata që kërkojnë një ushqim të pasur me proteina dhe që ndihmon në ruajtjen e peshës trupore.

Flaka