Fjetja herët sjell përfitime të shumta për shëndetin mendor dhe fizik

Ekspertët e shëndetit rekomandojnë që njerëzit të shkojnë në shtrat rreth orës 22:00, pasi ky zakon lidhet me një sërë përfitimesh për organizmin dhe mirëqenien mendore. Studime të ndryshme kanë treguar se fjetja më herët mund të ndihmojë në reduktimin e mendimeve negative që shpesh pengojnë gjumin cilësor.

Sipas specialistëve, mungesa e gjumit rrit nivelin e kortizolit, hormonit të stresit, duke shtuar rrezikun për ankth dhe lodhje gjatë ditës. Në të kundërt, një pushim i mjaftueshëm ndihmon në uljen e stresit, rrit energjinë dhe përmirëson përqendrimin.

Hulumtimet tregojnë gjithashtu se personat që flenë mjaftueshëm janë më të kënaqur me jetën dhe kanë një gjendje emocionale më të qëndrueshme. Gjumi cilësor ndikon drejtpërdrejt në kontrollin e emocioneve dhe në ruajtjen e ekuilibrit psikologjik.

Një tjetër përfitim i rëndësishëm është fakti se fjetja herët shpesh shoqërohet me zgjim më të hershëm, duke mundësuar ekspozim më të madh ndaj dritës natyrale të ditës. Kjo ndihmon në prodhimin e serotoninës, e njohur si hormoni i lumturisë, duke ndikuar pozitivisht në humor dhe mirëqenie.

Shumë figura të njohura publike, përfshirë Oprah Winfrey dhe Anna Wintour, e praktikojnë këtë zakon si pjesë të rutinës së tyre të përditshme.

Flaka