Fundjava e zgjatur zbrazi Shkupin, lëvizje më e theksuar në Çarshinë e Vjetër

Fundjava e zgjatur zbrazi Shkupin. Gjatë ditës mungonte “gjallëria” në kryeqytet. Shumë qytetar bashkuan ditët dhe ia mësynë kryesisht Greqisë. Këtë e tregojnë edhe të dhënat e MPB-së për hyrje-daljet në pikat kufitare. Ndërkohë lëvizje më të theksuar kishte në pjesën e Çarshisë së Vjetër.

“Kështu duket kryeqyteti sot. Vendet me të frekuentuara janë të boshatisura. Kjo pasi, qytetarët për shkak të fundjavës së zgjatur kanë ikur për pushime në vendet fqinjë”, raporton Linda Ebibi, gazetare.

Fundjavën e zgjatur dhe temperaturat e larta shumë qytetarë i shfrytëzuan për të bërë një pushim të shkurtër jashtë vendit. Këtë e dëshmon edhe fluksi i shtuar i makinave në pikën kufitare Bogorodicë, por dhe në Tabanoc.

“Më datë 08.09.2024 në periudhën kohore prej 00:00 deri në orën 24:00 në vendkalimin kufitar Bogorodicë në hyrje janë regjistruar 4.107 udhëtarë ndërsa në dalje 5.378 udhëtarë. Ndërsa më datë 09.09.2024 nga ora 00:00 deri në orën 09:00 në hyrje janë regjistruar 912 udhëtarë, ndërsa në dalje 2.302. Në vendkalimin kufitar Tabanoc, më datë 08.09.2024 kanë hyrë 8.103 ndërsa kanë dalë 6.229 udhëtarë. Më datë 09.09.2024 deri në orën 09:00 të mëngjesit në hyrje janë regjistruar 1.729 udhëtarë ndërsa në dalje 292”, njoftojnë nga MPB-ja.

Ndërkohë për ata që mbetën në kryeqytet, dita e sotme ishte e zakonshme. Frekuentim më të madh kishte në Çarshinë e Vjetër të Shkupit, sidomos në pjesën e Bit Pazarit.

“I vetmi vend që ka më shumë njerëz sikurse ditëve të punës është vendi në Bit Pazar. Këtu shumë dyqane janë të hapura dhe punojnë normalisht”, raporton Linda Ebibi, gazetare. /Alsat.mk