Gerard Martín i qetë para Real Madridit: “Nuk më intereson kë transferojnë, ne fokusohemi te vetja”

Gerard Martín ka folur për situatën te Barcelona, rivalitetin me Real Madridin dhe marrëdhënien e tij me trajnerin Hansi Flick, duke theksuar se skuadra katalanase është e përqendruar vetëm te objektivat e saj.

Mbrojtësi i Barcelonës nuk është shqetësuar nga lëvizjet e rivalit të përjetshëm në merkato, duke deklaruar se Real Madridi mund të transferojë cilindo lojtar që dëshiron.

“Le të nënshkruajnë kë të duan. Sinqerisht, nuk më intereson kë merr Real Madridi. Ne fokusohemi te vetja dhe do të garojmë si çdo vit”, u shpreh Gerard Martín.

Lojtari foli gjithashtu për mundësinë e afrimit të Julián Álvarez te Barcelona, duke thënë se sulmuesi argjentinas është një futbollist që e pëlqen, por vendimi për transferimet i takon klubit.

“Julián është një lojtar që më pëlqen, por është klubi ai që vendos kë dëshiron të afrojë. Kushdo që vjen do të jetë mjaftueshëm i mirë për Barcelonën”, tha ai.

Martín zbuloi edhe një moment të veçantë me legjendën e futbollit italian, Paolo Maldini, i cili i dërgoi një fanellë të nënshkruar për ditëlindje. Futbollisti katalanas tregoi se e vlerëson shumë këtë gjest dhe se e konsideron nder krahasimin me një ikonë të tillë.

Në fund, mbrojtësi foli me superlativa për trajnerin Hansi Flick, duke theksuar se tekniku gjerman i ka dhënë shumë besim dhe mbështetje që prej ardhjes së tij në skuadër.

“Flick është si një baba për ne. Ai më ka ndihmuar të fitoj besim dhe të përmirësohem”, u shpreh Gerard Martín.

Flaka