Goditja nga nxehtësia mund të jetë kërcënuese për jetën, si ta parandaloni gjatë verës

Temperaturat e larta gjatë verës mund të sjellin rreziqe serioze për shëndetin, ndërsa një nga gjendjet më të rrezikshme është goditja nga nxehtësia.

Kjo gjendje ndodh kur trupi nuk arrin më të rregullojë temperaturën e tij në mënyrë efektive, zakonisht si pasojë e ekspozimit të gjatë ndaj temperaturave të larta, lagështisë së madhe, dehidratimit ose aktivitetit fizik intensiv.

Më të rrezikuarit janë të moshuarit, fëmijët, sportistët, personat me sëmundje kronike dhe ata që punojnë jashtë gjatë ditëve të nxehta. Rrezik i madh paraqitet edhe qëndrimi në automjete të parkuara në diell, pasi temperatura brenda makinës mund të rritet shumë shpejt.

Shenjat kryesore të goditjes nga nxehtësia përfshijnë marramendje, të përziera, dhimbje koke, puls të shpejtë, temperaturë të lartë të trupit dhe lëkurë të nxehtë e të skuqur. Në raste më të rënda mund të shfaqen konfuzion, humbje e vetëdijes, konvulsione dhe dëmtime të organeve jetësore.

Ekspertët këshillojnë që gjatë temperaturave ekstreme të konsumohen mjaftueshëm lëngje, të shmanget dalja gjatë orëve më të nxehta të ditës dhe të përdoren veshje të lehta e të ajrosura.

Në rast dyshimi për goditje nga nxehtësia, personi duhet të dërgohet menjëherë në një ambient të freskët, të ftohet trupi me ujë të ftohtë ose peshqir të lagur dhe të kërkohet ndihmë mjekësore.

Përveç goditjes nga nxehtësia, ekspozimi i tepërt në diell mund të shkaktojë edhe djegie, lodhje nga nxehtësia dhe probleme të tjera shëndetësore, ndaj kujdesi dhe hidratimi janë shumë të rëndësishëm gjatë ditëve të nxehta të verës.

Flaka