Guardiola: Champions League nuk është matësi i vetëm i suksesit

Pep Guardiola ka dhënë një mesazh të fortë për mënyrën se si gjykohet suksesi i klubeve në futbollin modern, duke theksuar se Liga e Kampionëve nuk duhet të jetë kriteri i vetëm për të vlerësuar një sezon.

I pyetur se çfarë i mungon Barcelonës për të fituar Champions League, trajneri i Manchester Cityt u shpreh se kjo garë shpeshherë mund të “shkatërrojë projekte”, pasi rezultatet varen nga shumë faktorë që shkojnë përtej cilësisë së skuadrës.

“Shpresoj që kjo të mos ndodhë te Barcelona. Nuk duhet të mendojmë se vetëm sepse nuk fiton Champions League, gjithçka që është ndërtuar nuk vlen. Kampionati është gara që të jep vazhdimësi dhe qëndrueshmëri”, deklaroi Guardiola.

Tekniku katalanas shtoi se në fazat vendimtare të Champions League ndikojnë edhe faktorë të tjerë si dëmtimet, forma e momentit dhe madje edhe vendimet e arbitrave.

“Në Champions League duhet të arrish në momentet vendimtare në gjendjen më të mirë të mundshme, pa dëmtime, ndërsa edhe gjykimi i arbitrave mund të ketë ndikim të madh në rezultatet finale”, tha ai.

Guardiola theksoi se puna e përditshme dhe progresi i skuadrës janë elementët më të rëndësishëm për të vlerësuar suksesin e një projekti sportiv.

“Ajo që ka rëndësi është që puna e përditshme te Barcelona të jetë e shkëlqyer, skuadra të vazhdojë të rritet dhe të përmirësohet. Nuk duhet të mendojnë se sezoni është dështim vetëm sepse nuk arrijnë në finalen e Champions League apo nuk e fitojnë atë”, përfundoi ai.

Flaka