Ja pse ndiheni të lodhur pas drekës

Shumë njerëz ndihen të plogësht dhe të përgjumur menjëherë pas konsumimit të një vakti të bollshëm, sidomos gjatë drekës. Kjo ndjesi, e njohur në zhargonin popullor si “të zë buka”, është krejt normale dhe lidhet me mënyrën se si organizmi reagon gjatë procesit të tretjes.

Sipas ekspertëve, ushqimi shndërrohet në energji përmes sistemit tretës, proces gjatë të cilit organizmi çliron hormone që rrisin ndjesinë e ngopjes dhe relaksimit. Në të njëjtën kohë, në tru prodhohet serotonina – hormoni i lumturisë – si dhe melatonina, hormoni që ndihmon gjumin. Këto ndryshime biokimike janë arsyeja kryesore pse shumë persona ndihen të lodhur pas ngrënies.

Ndikim të madh ka edhe lloji i ushqimit që konsumoni. Ushqimet e pasura me proteina si vezët, djathi, peshku, soja dhe spinaqi përmbajnë aminoacide që ndihmojnë prodhimin e serotoninës, duke shtuar ndjesinë e përgjumjes. Nga ana tjetër, një regjim ushqimor i pasur me perime, drithëra dhe yndyrna të shëndetshme ndihmon në ruajtjen e energjisë gjatë ditës.

Ekspertët theksojnë gjithashtu se mungesa e gjumit gjatë natës mund ta përkeqësojë lodhjen pas ushqimit. Një regjim i rregullt gjumi, aktiviteti fizik dhe shmangia e vakteve shumë të rënda mund të ndihmojnë në reduktimin e kësaj ndjesie.

Megjithatë, në raste të rralla, lodhja e tepërt pas ngrënies mund të jetë shenjë e problemeve shëndetësore si diabeti, anemia apo çrregullimet e tiroides. Nëse përgjumja është e vazhdueshme dhe intensive, rekomandohet konsultimi me mjekun.

Flaka