Kafeja mund të ulë rrezikun e Parkinsonit dhe diabetit të tipit 2

Kafeja nuk është vetëm një pije që na zgjon në mëngjes, por sipas një numri të madh studimesh shkencore, ajo mund të ketë ndikim pozitiv edhe në shëndetin afatgjatë. Hulumtimet e viteve të fundit tregojnë se konsumimi i rregullt i kafesë lidhet me një rrezik më të ulët të zhvillimit të disa sëmundjeve serioze, si diabeti i tipit 2, sëmundjet kronike të mëlçisë dhe sëmundja e Parkinsonit.

Ekspertët theksojnë se kafeja përmban mbi një mijë komponime kimike, përfshirë polifenolet dhe vitaminat, të cilat kanë veti anti-inflamatore dhe antioksiduese. Një analizë e publikuar në revistën shkencore Nutrients ka treguar se personat që konsumojnë rregullisht kafe kanë një rrezik më të ulët të vdekjes së parakohshme krahasuar me ata që nuk e pinë fare.

Një studim i vitit 2021, i cili përfshiu pothuajse 500 mijë të rritur dhe zgjati 11 vjet, zbuloi se konsumuesit e kafesë kishin 21 për qind më pak gjasa të zhvillonin sëmundje kronike të mëlçisë dhe 49 për qind më pak rrezik për të humbur jetën si pasojë e tyre. Studiuesit theksojnë se përfitimet shfaqen edhe me një filxhan në ditë, ndërsa konsumimi i tre deri në katër filxhanëve lidhet me efektet më të mëdha mbrojtëse.

Kafeja lidhet gjithashtu me një ndjeshmëri më të mirë ndaj insulinës, çka ndihmon në uljen e rrezikut për diabetin e tipit 2. Sipas studimeve, çdo filxhan i konsumuar në ditë mund të ulë rrezikun e kësaj sëmundjeje me rreth gjashtë për qind.

Një tjetër përfitim i rëndësishëm lidhet me shëndetin e trurit. Meta-analizat tregojnë se personat që pinë deri në tre filxhanë kafe në ditë kanë rreth 28 për qind më pak gjasa të zhvillojnë sëmundjen e Parkinsonit. Shkencëtarët besojnë se kafeina ndihmon në mbrojtjen e neuroneve që prodhojnë dopaminë, e cila luan rol kyç në kontrollin e lëvizjeve.

Përveç kësaj, një studim i publikuar në vitin 2023 në New England Journal of Medicine zbuloi se njerëzit bënin mesatarisht rreth 1.000 hapa më shumë në ditët kur konsumonin kafe, krahasuar me ditët kur nuk e pinin. Ekspertët theksojnë se ky aktivitet shtesë fizik lidhet me një ulje të konsiderueshme të rrezikut të vdekshmërisë.

Megjithatë, specialistët kujtojnë se kafeja duhet të konsumohet me masë dhe si pjesë e një stili jetese të shëndetshëm, pasi efektet mund të ndryshojnë nga një person te tjetri.

Flaka