Kujdes nga ushqimi i kontaminuar, ja shenjat e helmimit

Helmimi nga ushqimi është një nga problemet më të zakonshme shëndetësore, i shkaktuar nga konsumimi i ushqimeve të kontaminuara me baktere, viruse, parazitë, toksina ose kimikate. Edhe pse bakteret janë të pranishme në shumë ushqime, përpunimi, gatimi ose ruajtja e papërshtatshme mund të favorizojnë shumimin e tyre dhe të shkaktojnë infeksione.

Simptomat më të zakonshme të helmimit ushqimor përfshijnë diarrenë, të përzierat, të vjellat, dhimbjet e stomakut, ethet dhe dehidratimin. Në rastet e dehidratimit mund të shfaqen edhe marramendje, humbje e ekuilibrit, lodhje e theksuar dhe etje e vazhdueshme.

Më të rrezikuar nga helmimi janë të moshuarit, foshnjat dhe fëmijët e vegjël, personat me sëmundje kronike ose sistem imunitar të dobësuar, si dhe gratë shtatzëna, të cilat janë më të ndjeshme ndaj infeksioneve ushqimore.

Nëse dyshoni se jeni helmuar nga ushqimi, ekspertët rekomandojnë të konsumoni lëngje në sasi të vogla dhe të shpeshta për të shmangur dehidratimin. Pirja e ujit me gllënjka të vogla, veçanërisht ujë i vakët, mund të ndihmojë në lehtësimin e simptomave.

Gjithashtu, këshillohet të shmanget përdorimi i medikamenteve kundër diarresë pa rekomandimin e mjekut, pasi ato mund të ngadalësojnë eliminimin e baktereve ose toksinave nga organizmi.

Ndihma mjekësore duhet kërkuar menjëherë nëse të vjellat zgjasin më shumë se dy ditë, diarreja vazhdon për disa ditë, temperatura e trupit kalon 38 gradë Celsius, shfaqen vështirësi në ruajtjen e ekuilibrit, konfuzion ose dhimbje të forta të barkut.

Flaka