Meidani: Një diplomë hap dyer, por përgjegjësia është t’i mbani hapur edhe për të tjerët

Një mesazh përtej ceremonisë akademike përcolli ambasadori i Shqipërisë në Maqedoninë e Veriut, Denion Meidani, në hapjen e vitit të ri akademik në Universitetin “Nënë Tereza” në Shkup.

Duke iu drejtuar studentëve, profesorëve dhe drejtuesve të universitetit, Meidani e vendosi fjalimin e tij në tri shtylla: dija, përgjegjësia dhe e drejta.

Ai u ndal veçanërisht te emri i universitetit dhe figura e Nënë Terezës, e lindur në Shkup.

“Ajo nuk pati ushtri. Nuk pati pasuri. Nuk pati pushtet. Pati një jetë, të cilën ia kushtoi të tjerëve.”

Për ambasadorin, kjo është edhe një metaforë për rolin që studentët mund të kenë në shoqëri: jo vetëm të marrin një diplomë, por të përdorin dijen për të krijuar mundësi edhe për të tjerët.

Meidani solli në vëmendje edhe fjalimin e John F. Kennedy-t në Kolegjin Amherst më 1963, duke e përmbledhur mesazhin për studentët me një fjali:

“Një diplomë ju hap dyer. Përgjegjësia juaj është t’i mbani ato dyer të hapura edhe për të tjerët.”

Një tjetër pikë e fortë e fjalimit ishte çështja e përdorimit të gjuhës shqipe në drejtësi. Meidani përmendi përpjekjen e Parlamentit Studentor dhe Fakultetit të Drejtësisë, në bashkëpunim me rektoratin dhe pedagogët, për realizimin e të drejtave të studentëve.

Sipas tij, kërkesa është bërë “me argument, durim, dinjitet dhe respekt për institucionet”, ndërsa e lidhi këtë çështje me sundimin e ligjit dhe rrugën evropiane të Maqedonisë së Veriut.

Duke iu referuar deklaratës së ambasadorit Ferit Hoxha, Meidani tha se zbatimi i plotë i Ligjit për Përdorimin e Gjuhëve lidhet me rendin kushtetues, barazinë dhe procesin evropian të vendit.

Ai foli edhe për një universitet ku studentët shqiptarë, maqedonas dhe të komuniteteve të tjera do të ndajnë laboratorët, projektet dhe ambiciet, ndërsa diploma në gjuhën shqipe, sipas vizionit të tij, duhet të jetë e vlefshme për çdo derë profesionale – edhe për sallën e gjyqit.

Në fund, Meidani u kërkoi studentëve të shohin botën dhe të mësojnë prej saj, por të mos harrojnë vendin që ka nevojë për dijen dhe punën e tyre.

Dhe la një fjali që tingëlloi edhe si një lamtumirë e mundshme, edhe si një premtim:

“Kudo që të jem, jam dhe do të jem me ju.”

Nga auditorët e Universitetit “Nënë Tereza”, mesazhi i ambasadorit ishte i qartë: diploma nuk është fundi i rrugës. Është momenti kur fillon përgjegjësia.