Para se të ndizni skarën, ja çfarë duhet të dini për mishin dhe peshkun

Grilata është një nga mënyrat më të dashura të përgatitjes së ushqimit, duke bashkuar shijen e mishit, peshkut apo perimeve me atmosferën e një vakti mes familjes dhe miqve.

Pjekja në skarë ka një histori të gjatë dhe vazhdon të jetë pjesë e traditës së shumë vendeve. Megjithatë, për një rezultat sa më të mirë, nuk mjafton vetëm ndezja e zjarrit – rëndësi të madhe kanë zgjedhja e produktit dhe përgatitja para pjekjes.

Ekspertët e kuzhinës këshillojnë që mishi i bardhë të marinohet paraprakisht, në mënyrë që të ruajë butësinë dhe të mos thahet gjatë pjekjes. Për një marinim të shijshëm mund të përdoren përbërës si kosi, limoni, erëzat aromatike, hudhra dhe piperi.

Edhe peshku mund të marrë një shije të veçantë në skarë falë marinimeve me vaj ulliri, limon, majdanoz, hudhër dhe erëza të ndryshme.

Për mishin e bardhë, një kombinim interesant është përzierja e kosit me curry, majdanoz, lëng limoni, piper dhe hudhër. Copat e mishit lihen të pushojnë në këtë marinim për rreth dy orë para pjekjes.

Ndërsa për peshkun, një marinim i thjeshtë me limon, hudhër, majdanoz dhe trumzë mund të përmirësojë ndjeshëm shijen.

Një detaj i rëndësishëm është që para vendosjes në skarë, mishi dhe peshku duhet të kullohen mirë nga marinimi dhe të thahen me letër kuzhine, në mënyrë që pjekja të jetë sa më e rregullt.

Me pak kujdes në përgatitje, një grilatë mund të shndërrohet në një vakt perfekt me aromë dhe shije të paharrueshme.

Flaka