Pse astronautëve shpesh u duket ushqimi pa shije? Ja çfarë thotë studimi

Në një studim novator, studiuesit e Institutit Mbretëror të Teknologjisë së Melburnit (RMIT) në Australi kanë zbuluar arsyet pse astronautëve shpesh u duket ushqimi pa shije dhe përballen me probleme për të përmbushur nevojat e tyre ushqyese gjatë kohës që janë në hapësirë. Gjetjet e publikuara në Gazetën Ndërkombëtare të Shkencës dhe Teknologjisë së Ushqimit tregojnë se perceptimi hapësinor mund të jetë shumë ndikues për sa i përket mënyrës se si njerëzit nuhasin aroma të ndryshme dhe shijojnë shije të ndryshme.

Për më tepër, ndjenja e vetmisë në Stacionin Ndërkombëtar të Hapësirës (ISS) mund të ndikojë në shijen dhe nuhatjen e astronautëve, raportoi një studim. Studimi përfshiu 54 astronautë dhe ekzaminoi perceptimet e tyre për aromat dhe shijen e ushqimeve të zakonshme si vaji esencial i limonit, vanilja dhe ekstraktet e bajameve, nga një mjedis normal në Tokë në një mjedis hapësinor.

Studiuesit zbuluan se aroma e ekstraktit të vaniljes dhe bajames perceptohej si më intensive në një mjedis normal, ndërsa aroma e limonit mbeti e pandryshuar. Ky ishte rasti sepse ekstraktet e vaniljes dhe bajames përmbajnë një përbërje organike të quajtur benzaldehid. Dr Julia Low, një bashkë-studiuese, tha se vetmia mund të jetë gjithashtu arsyeja për rezultate të tilla. Ajo theksoi planin afatgjatë për të rritur marrjen e ushqimit të astronautëve.

“Një ndjenjë më e madhe vetmie dhe izolimi mund të luajë gjithashtu një rol, dhe ka implikime nga ky studim rreth mënyrës se si njerëzit e izoluar e nuhasin dhe shijojnë ushqimin,” tha Dr Julia. “Një nga qëllimet afatgjata të hulumtimit është të krijojë ushqime të përshtatura më mirë për astronautët, si dhe për njerëzit e tjerë që janë në mjedise të izoluara, për të rritur marrjen e tyre ushqyese afër 100%.

Rezultatet e këtij studimi mund të ndihmojnë në personalizimin e dietave të njerëzve në situata të izoluara nga shoqëria, përfshirë në shtëpitë e të moshuarve, dhe të përmirësojnë marrjen e tyre ushqyese.”. Më parë, studiuesit zbuluan se astronautët e ndjejnë ndryshimin për shkak të mungesës së gravitetit në hapësirë.