Rënia e flokëve nuk vjen vetëm nga stinët, ja faktorët e fshehur që ndikojnë në shëndetin e tyre

Rënia e flokëve është një problem i zakonshëm që prek shumë njerëz, por shkaqet e saj nuk lidhen vetëm me ndryshimin e stinëve apo mungesën e vitaminave.

Ekspertët shpjegojnë se faktorë të ndryshëm mund të ndikojnë në dobësimin dhe humbjen e flokëve, duke filluar nga medikamentet e deri te stresi dhe mënyra e kujdesit të përditshëm.

Një ndër shkaqet mund të jenë disa ilaçe, përfshirë holluesit e gjakut, medikamentet kundër akneve, artritit, depresionit, problemeve të zemrës dhe tensionit, të cilat mund të kenë si efekt anësor rënien e flokëve.

Ndryshimet hormonale pas lindjes së fëmijës janë një tjetër faktor i zakonshëm. Shumë gra përjetojnë rënie të shtuar të flokëve disa muaj pas lindjes, derisa hormonet të rikthehen në ekuilibër.

Mungesa e hekurit në organizëm gjithashtu mund të ndikojë në shëndetin e flokëve, duke shkaktuar dobësim të tyre, thonj të brishtë dhe lodhje të përgjithshme.

Stresi dhe ankthi janë ndër faktorët që ndikojnë negativisht në rritjen e flokëve, ndërsa përdorimi i shpeshtë i tharëseve, bojërave, llakut dhe trajtimeve të ndryshme mund t’i bëjë flokët më të brishtë dhe më të prirur për t’u këputur.

Rënia e flokëve mund të jetë gjithashtu shenjë e disa problemeve shëndetësore, përfshirë çrregullimet e tiroides, dobësimin e imunitetit, infeksionet ose temperaturat e larta.

Edhe duhani ndikon negativisht, pasi toksinat në tymin e tij mund të dëmtojnë qarkullimin dhe të pengojnë rritjen normale të flokëve.

Përveç trajtimeve mjekësore, disa njerëz përdorin edhe metoda natyrale për kujdesin e flokëve. Një prej tyre është përdorimi i hithrës, e cila tradicionalisht përdoret për forcimin e rrënjëve të flokëve. Lëngu i përgatitur nga hithrat mund të aplikohet në skalp pas larjes së flokëve dhe të përdoret disa herë në javë.

Megjithatë, në rastet kur rënia e flokëve është e madhe ose e papritur, këshillohet konsultimi me mjekun për të zbuluar shkakun e vërtetë.

Flaka