Rinovimi i Vinicius Jr me Real Madridin ngec sërish, Botërori pritet të jetë vendimtar
Bisedimet për rinovimin e kontratës së Vinícius Júnior me Real Madrid kanë hyrë sërish në një fazë pasigurie, pavarësisht se marrëveshja dukej shumë pranë finalizimit.
Sipas raportimeve të Diario AS, sulmuesi brazilian ka bërë lëshime të konsiderueshme gjatë negociatave, duke ulur ndjeshëm kërkesat e tij financiare. Nga ana tjetër, Real Madridi ka përmirësuar ofertën e tij, por jo në të njëjtën masë sa kompromisi i bërë nga lojtari.
Për një periudhë, palët ishin shumë afër arritjes së një marrëveshjeje të re, megjithatë negociatat kanë ngecur sërish dhe ende nuk ka një dakordim përfundimtar.
Raporti shton se performanca e Viniciusit në Botërorin e ardhshëm mund të ketë ndikim të madh në zhvillimin e mëtejshëm të bisedimeve. Turneu konsiderohet një moment kyç që mund të përcaktojë jo vetëm vlerën e tij në treg, por edhe kushtet e kontratës së re me klubin madrilen.
Pavarësisht ngadalësimit të negociatave, drejtuesit e Real Madridit dhe përfaqësuesit e lojtarit mbeten të interesuar për të gjetur një zgjidhje që do ta mbante brazilianin në “Santiago Bernabéu” për shumë vite të tjera.
Flaka
















