Saliba: “U detyrova të buzëqeshja në paradë, por humbja në finale më la vetëm keqardhje”

Mbrojtësi i Arsenalit, William Saliba, ka folur hapur për zhgënjimin e madh pas humbjes në finalen e Ligës së Kampionëve ndaj PSG-së, duke pranuar se ndjeu më shumë keqardhje sesa krenari pas ndeshjes.

Në një intervistë për France Football, francezi deklaroi se Arsenali kishte zhvilluar një ndeshje të shkëlqyer dhe se ekipi londinez ishte shumë pranë triumfit.

“Keqardhje? Sigurisht që po. Kur shënon i pari në një finale, pëson vetëm nga penalltia dhe më pas humbet me penallti, normalisht që mbetesh i hidhëruar”, tha Saliba.

Ai hodhi poshtë pretendimet se Arsenali kishte shënuar shumë herët ndaj PSG-së.

“Kam dëgjuar njerëz që thoshin se shënuam shumë shpejt, por unë preferoj të kaloj në avantazh kundër një skuadre si PSG sesa të ndodhë e kundërta”, shtoi mbrojtësi francez.

Saliba kujtoi edhe rastin e artë të Kai Havertz për rezultatin 2-0 para pushimit mes pjesëve, duke theksuar se ndeshja mund të kishte marrë një rrjedhë krejt tjetër.

“Patëm një mundësi të madhe për ta bërë 2-0. Nëse do të kishim shënuar, askush nuk do të thoshte se shënuam shumë herët”, deklaroi ai.

Sipas tij, Arsenali kishte përgatitur planin e duhur dhe kishte arritur ta vinte PSG-në në vështirësi si rrallëherë gjatë pjesës së parë.

Megjithatë, zhgënjimi mbeti i madh edhe pas përfundimit të sezonit.

“Një ditë më pas, gjatë paradës, u detyrova të buzëqeshja që të mos ua prishja festën tifozëve. Por brenda vetes ndihesha ende i zhgënjyer nga humbja e finales”, përfundoi Saliba.

Flaka