Si ndikon kafeja në metabolizëm dhe djegien e yndyrës

Pirja e kafesë mund të aktivizojë mekanizmat mbrojtës të trupit kundër grumbullimit të yndyrnave, një zbulim që mund të ketë ndikim të madh në luftën kundër obezitetit dhe diabetit.

Sipas një studimi të publikuar nga Universiteti i Nottinghamit, kafeja ndihmon në stimulimin e yndyrnave kafe (të njohura si brown adipose tissue), të cilat luajnë një rol kyç në mënyrën se si trupi ynë djeg kaloritë dhe prodhon energji.

Çfarë janë yndyrnat kafe dhe pse janë të rëndësishme?

Trupi i njeriut përmban dy lloje kryesore të qelizave yndyrore:

• Yndyrnat e bardha, të cilat shërbejnë për depozitimin e energjisë
• Yndyrnat kafe, të cilat ndihmojnë në gjenerimin e nxehtësisë dhe rritjen e metabolizmit

Yndyrnat kafe janë më të përhapura tek fëmijët, por zbulimi i pranisë së tyre edhe tek të rriturit ka hapur rrugë të reja për trajtime potenciale kundër mbipeshës.

Roli i kafesë në djegien e kalorive

Shkencëtarët testuan kafenë për të parë nëse ajo mund të aktivizojë yndyrnat kafe. Pas përcaktimit të dozës së duhur, testimet tek njerëzit treguan se një filxhan kafe mund të stimulojë këtë lloj yndyre, duke ndihmuar në rritjen e djegies së kalorive.

Megjithëse studimi ndodhet ende në fazat e hershme, rezultatet janë premtuese dhe sugjerojnë se pirja e moderuar e kafesë mund të kontribuojë në humbjen e peshës dhe përmirësimin e metabolizmit.

Ekspertët theksojnë se nevojiten më shumë studime për të konfirmuar këto përfitime dhe për të përcaktuar sasinë ideale të konsumit ditor.

Flaka