Si ta mbani trurin aktiv dhe të shëndetshëm me aktivitete të thjeshta

Shëndeti i trurit nuk varet vetëm nga ushtrimet e vështira mendore apo sfidat stresuese. Sipas studimeve të fundit, edhe aktivitetet e zakonshme të përditshme mund të ndihmojnë në ruajtjen e kujtesës, forcimin e aftësive mendore dhe ngadalësimin e plakjes së trurit.

Ekspertët theksojnë se truri përfiton shumë nga orientimi në hapësirë dhe eksplorimi i vendeve të reja. Pjesa e trurit e quajtur hipokampus, e lidhur ngushtë me kujtesën dhe orientimin, është një nga zonat që preket më herët nga sëmundje si Alzheimeri. Studiuesit kanë zbuluar se persona si shoferët e taksive apo ambulancave, të cilët mbajnë mend rrugë dhe orientohen vazhdimisht, kanë një hipokampus më të zhvilluar dhe rrezik më të ulët për demencë.

Kjo do të thotë se edhe zakone të thjeshta si ecja pa GPS, ndryshimi i itinerareve të përditshme apo eksplorimi i lagjeve të reja mund të jenë shumë të dobishme për trurin.

Një rol të madh luan edhe jeta sociale. Bisedat, debatet dhe aktivitetet me njerëz të tjerë aktivizojnë disa pjesë të trurit njëkohësisht, duke ndihmuar kujtesën, komunikimin dhe aftësinë për planifikim. Sipas studiuesve, njerëzit që janë më aktivë socialisht kanë më pak gjasa të zhvillojnë probleme me kujtesën në moshë të thyer.

Po ashtu, mësimi gjatë gjithë jetës mbetet një nga “armët” më të forta kundër plakjes mendore. Leximi, mësimi i një hobi të ri, kopshtaria apo pjesëmarrja në aktivitete kulturore ndihmojnë në krijimin e lidhjeve të reja nervore dhe rrisin neuroplasticitetin – aftësinë e trurit për t’u përshtatur dhe zhvilluar.

Ekspertët nënvizojnë se nuk nevojiten ndryshime drastike për të mbajtur trurin aktiv. Edhe hapa të vegjël në rutinën e përditshme mund të kenë ndikim të madh në shëndetin mendor dhe cilësinë e jetës.

Flaka