Studim i ri: Mungesa e ujit gjatë ditës mund të ndikojë në cilësinë e gjumit

Një studim i fundit shkencor sugjeron se mungesa e hidratimit gjatë ditës mund të jetë një nga faktorët që ndikon në cilësinë e gjumit gjatë natës.

Sipas hulumtimit të realizuar nga akademikë në Universiteti Penn State, njerëzit që flinin mesatarisht rreth 6 orë në natë kishin urinë më të koncentruar dhe shenja më të larta dehidratimi krahasuar me ata që flinin rreth 8 orë, që konsiderohet edhe koha e rekomanduar e gjumit.

Studimi, i cili përfshiu mbi 20 mijë të rritur në Shtetet e Bashkuara dhe Kinë, sugjeron një lidhje të drejtpërdrejtë mes cilësisë së gjumit dhe nivelit të hidratimit në trup.

Autori kryesor i studimit, Asher Rosinger, theksoi se mungesa e gjumit dhe dehidratimi mund të jenë të lidhura dhe se rritja e konsumit të ujit gjatë ditës mund të ndihmojë në përmirësimin e gjendjes së përgjithshme.

Sipas tij, personat që ndihen të lodhur apo të përgjumur pas një nate të shkurtër gjumi mund të përfitojnë nga konsumimi i ujit shtesë.

Dehidratimi, sipas ekspertëve, mund të shkaktojë efekte të ndryshme negative si marramendje, lodhje dhe ndryshime në ngjyrën dhe erën e urinës.

Megjithatë, specialistët theksojnë se sasia ideale e ujit që duhet konsumuar çdo ditë mbetet e diskutueshme, duke variuar nga 2 deri në 4 litra në varësi të individit dhe stilit të jetesës.

Flaka