Studim zviceran: Shega mund të ndihmojë në ngadalësimin e plakjes së qelizave

Studiues zviceranë kanë zbuluar se përbërësit natyralë që gjenden te shega mund të kenë ndikim në ngadalësimin e proceseve të plakjes në nivel qelizor.

Sipas hulumtimit, antioksidantët si taninat dhe ellagitaninat që gjenden në shegë, në sistemin e tretjes shndërrohen në përbërje që lidhen me përmirësimin e funksionit qelizor. Një nga këto përbërje, urolithin A, është vlerësuar për aftësinë e saj për të stimuluar proceset që lidhen me energjinë qelizore dhe funksionin mitokondrial.

Shkencëtarët theksojnë se me kalimin e moshës, sidomos pas moshës 50 vjeç, muskujt fillojnë të humbasin forcën dhe masën për shkak të plakjes natyrale të qelizave. Megjithatë, studimi sugjeron se urolithin A mund të ndihmojë në përmirësimin e funksionit të mitokondrive dhe potencialisht të ndikojë në ngadalësimin e këtij procesi.

Në të kaluarën, disa pretendime shëndetësore për shegën kanë qenë të kontestuara. Madje në vitin 2016, autoritetet amerikane kufizuan disa reklama të produkteve të lëngut të shegës për pretendime të paqarta mbi efektet shëndetësore.

Megjithatë, studimi i fundit sjell një gjetje më të fokusuar shkencore, duke sugjeruar një lidhje të mundshme mes konsumimit të përbërësve të shegës dhe përmirësimit të funksioneve qelizore që lidhen me plakjen.

Flaka