Studimi alarmon: Ushqimet ultra të përpunuara mund të përshpejtojnë rënien e funksioneve të trurit

Ushqimi që konsumojmë çdo ditë mund të ketë ndikim të madh jo vetëm në trup, por edhe në funksionimin e trurit. Një studim i ri ka ngritur shqetësime për ndikimin e ushqimeve ultra të përpunuara në aftësitë njohëse.

Hulumtimi, ku morën pjesë rreth 10 mijë persona, ka treguar se njerëzit që konsumojnë sasi më të mëdha të ushqimeve ultra të përpunuara mund të kenë një rënie më të shpejtë të funksioneve njohëse.

Sipas rezultateve të studimit, personat që merrnin më shumë se 20 për qind të kalorive ditore nga këto ushqime kishin një përshpejtim të rënies globale njohëse me rreth 28 për qind, si dhe një rënie më të shpejtë të funksioneve ekzekutive të trurit.

Autorja e studimit, Claudia Suemoto, theksoi se ushqimet ultra të përpunuara tashmë përbëjnë një pjesë të konsiderueshme të dietës moderne, duke zënë rreth 25 deri në 30 për qind të kalorive ditore te shumë njerëz.

Ushqimet ultra të përpunuara përfshijnë produkte si biskota, ushqime të kripura, ëmbëlsira të paketuara dhe produkte të tjera industriale që përmbajnë sasi të larta sheqeri, kripe, yndyrash, ngjyruesish artificialë dhe aditivësh.

Ekspertët paralajmërojnë se ndikimi i tyre nuk kufizohet vetëm te truri. Konsumi i shpeshtë i këtyre produkteve është lidhur edhe me rritje të rrezikut për sëmundje të zemrës, probleme cerebrovaskulare dhe diabet të tipit 2.

Specialistët këshillojnë që dieta e përditshme të bazohet më shumë në ushqime të freskëta dhe natyrale, duke kufizuar sa më shumë produktet e përpunuara.

Flaka