Ushqimet që rrisin tensionin e gjakut dhe duhet t’i shmangni

Tensioni i lartë i gjakut është një ndër problemet shëndetësore më të përhapura dhe lidhet drejtpërdrejt me sëmundje serioze të zemrës, trurit dhe veshkave. Përveç këtyre, hipertensioni mund të shkaktojë edhe komplikime të rënda që ndikojnë në lëvizjen e gjymtyrëve dhe cilësinë e përgjithshme të jetës.

Ekspertët shëndetësorë theksojnë se për të shmangur rritjen e tensionit të gjakut, duhet treguar kujdes i veçantë jo vetëm me sasinë e kripës, por edhe me përzgjedhjen e ushqimeve që konsumohen çdo ditë.

Sipas AgroWeb.org, më poshtë janë disa nga ushqimet që ndikojnë drejtpërdrejt në rritjen e tensionit të gjakut:

Mishi i kuq
Edhe pse i shijshëm, mishi i kuq përmban sasi të larta kolesteroli dhe kripë, duke dëmtuar zemrën dhe enët e gjakut. Një sasi prej 400 gramësh mish i gatuar përmban rreth 254 miligramë kripë dhe 308 miligramë kolesterol. E njëjta gjë vlen edhe për produktet e përpunuara si pançeta, sallami dhe proshutat.

Picat e ngrira
Picat e gatshme janë një zgjidhje e shpejtë për ushqim, por një racion i vetëm mund të përmbajë deri në 1.000 miligramë sodium. Kripa dhe aditivët e shtuar për ruajtje rrisin ndjeshëm rrezikun për hipertension.

Salcat e paketuara të domates
Salcat e domateve të ambalazhuara në qelq apo metal përmbajnë sasi të larta kripe. Një paketim i vetëm përmban rreth 654 miligramë kripë, ndërsa një racion makarona me salcë domate dhe mish mund të arrijë deri në 1.300 miligramë kripë.

Turshitë e gatshme
Një filxhan me lakër turshi të gatshme përmban rreth 939 miligramë kripë. Turshitë e tjera, si kastravecët apo domatet, janë të zhytura në lëng me kripë dhe një filxhan me kastravecë turshi përmban mbi 1.250 miligramë sodium. Personat me tension të lartë duhet t’i shmangin këto produkte ose të konsumojnë vetëm turshi të përgatitura në shtëpi.

Alkooli
Konsumi i moderuar i alkoolit zakonisht nuk shkakton probleme, por teprimi rrit ndjeshëm tensionin e gjakut. Alkooli gjithashtu mund të ndërhyjë në veprimin e barnave kundër hipertensionit dhe të ulë efektivitetin e tyre.

Ëmbëlsirat e paketuara
Biskotat dhe ëmbëlsirat industriale përmbajnë sasi të mëdha sheqeri, yndyrash të ngopura dhe kripë. Konsumi i shpeshtë i tyre rrit tensionin e gjakut, nivelin e sheqerit dhe rrezikun për mbipeshë.

Pijet energjike
Studimet tregojnë se pijet energjike rrisin tensionin sistolik me rreth 6.2 për qind dhe atë diastolik me 6.8 për qind. Pas konsumimit të një pije energjike, tensioni mesatar i gjakut rritet me mbi 6 për qind.

Ekspertët këshillojnë që personat me tension të lartë të jenë të kujdesshëm me ushqimin dhe të konsultohen rregullisht me mjekun për menaxhimin e kësaj gjendjeje.

Ky informacion ka për qëllim të informojë dhe nuk zëvendëson këshillat profesionale mjekësore.

Flaka