Vetëvritet një 15-vjeçar, Ekspertët: Vetëvrasjet po shënojnë rritje

Një i mitur i moshës 15-vjeçare ka humbur jetën pasi është hedhur nga garazhi shumëkatësh “Razloveçko Vostanie”, që ndodhet në afërsi të Qendrës së vjetër Tregtare në Shkup. Sipas dëshmitarëve, personi është hedhur nga një objekt aty pranë. Ekipet e policisë kanë mbërritur menjëherë në terren dhe kanë kryer kontrollin. Fenomeni i vetëvrasjeve në vendin tonë po shënon rritje, fatkeqësisht numri më i madh i vetëvrasjeve ndodh tek adoleshentët, thotë përfaqësuesi i Shoqatës së Psikoterapeutëve, Ylli Avdiaj.

“Jemi në një kohë kur secili fëmijë ose secili i ri ka qasje në rrjetet sociale, ka qasje në grupe të ndryshme ose bëhet pjesë e lojërave të ndryshme, e shoqërive të ndryshme, kulteve të ndryshme, ato shpeshherë e kanë një rol deri te kjo rrugë që i çojnë disa. Është fenomeni p.sh. që të gjithë jemi në dijeni, siç ishte “Balena blu”. Kur po flasim për një adoleshent ose një fëmijë, ne nënkuptojmë një qenie e cila akoma nuk e ka arritur një zhvillim të pjekurisë, që të arrihet të kuptohet se çfarë veprimesh po bën, a janë veprime të duhura ato që po i ndërmerr, lojërat ku po bëhet pjesëmarrës.”, – deklaroi përfaqësuesin e Shoqatës së Psikoterapeutëve, Yll Avdiaj.

Sipas Avdijajt, shpeshherë edhe neglizhenca apo komunikimi, ajo klima e ftohtë që po ndodh në familjet tona, kjo i bën fëmijët që ata të kenë nevojë të kërkojnë diku tjetër shoqëri apo ngushëllim. Sipas Policisë së Maqedonisë, numri më i madh i vetëvrasjeve është kryer në rajonin e qyteteve të Manastirit dhe Shtipit, e më pas edhe qytetet si Shkupi, Kumanova, Strumica, Ohri, mirëpo nuk përjashtohen edhe rajonet tjera.