Yndyrat nuk janë armik: Cilat janë të dëmshme dhe cilat i duhen trupit tonë

Për vite me radhë yndyra është konsideruar si një nga armiqtë kryesorë të shëndetit, ndërsa tregu është mbushur me produkte “pa yndyrë”. Por jo të gjitha yndyrat janë të njëjta dhe eliminimi i plotë i tyre nga dieta nuk është zgjidhja më e mirë për organizmin.

Yndyrnat janë një element i rëndësishëm për trupin, pasi ndihmojnë në prodhimin e energjisë, mbështesin funksionimin e qelizave dhe luajnë rol në përthithjen e disa vitaminave të rëndësishme.

Megjithatë, ekzistojnë yndyra që mund të ndikojnë negativisht në shëndet. Yndyrat e ngopura, të cilat gjenden kryesisht te mishi me shumë yndyrë, produktet e qumështit me yndyrë të plotë dhe disa vajra tropikalë, mund të ndikojnë në rritjen e nivelit të kolesterolit në gjak dhe të shtojnë rrezikun për probleme kardiovaskulare.

Edhe më problematike konsiderohen yndyrat trans, të cilat gjenden në shumë ushqime të përpunuara, produkte të skuqura, margarinë dhe ëmbëlsira industriale. Këto yndyra mund të rrisin kolesterolin e keq dhe të ulin nivelin e kolesterolit të mirë.

Nga ana tjetër, yndyrat e pangopura njihen si “yndyra të mira” dhe janë të rëndësishme për një organizëm të shëndetshëm. Ato mund të ndihmojnë në përmirësimin e niveleve të kolesterolit dhe në mbështetjen e shëndetit të zemrës.

Burime të yndyrave të shëndetshme janë avokado, ullinjtë, arrat, farat, peshku i yndyrshëm dhe gjalpi natyral i kikirikut.

Ekspertët theksojnë se qëllimi nuk duhet të jetë eliminimi i yndyrave nga dieta, por zgjedhja e llojit të duhur dhe konsumimi i tyre në sasi të balancuara.

Flaka