Dy vite nga vdekja e veprimtarit Kadir Nuhiu – kujtohet kontributi i tij në çështjen kombëtare
Botuar nga Flaka
Sot shënohen dy vite nga ndarja nga jeta e veprimtarit dhe aktivistit të çështjes kombëtare, Kadir Nuhiu, i cili ndër vite ishte i angazhuar në lëvizjet politike dhe kombëtare në rajonin e Pollogut.
Kadir Nuhiu ndërroi jetë më 5 mars 2024, ndërsa në ditën e varrimit të tij bashkëveprimtarë dhe miq të idealit e kujtuan si një aktivist të përkushtuar dhe një figurë që kontribuoi në organizimin dhe mobilizimin e veprimtarisë kombëtare në periudha të ndryshme.
Ai kishte lindur në fshatin Koritë, ku kreu edhe arsimin fillor, ndërsa shkollën e mesme industriale e përfundoi në Gostivar. Studimet i vazhdoi në Universitetin e Prishtinës, në Fakultetin e Edukatës Fizike, por për shkak të rrethanave politike të kohës nuk arriti t’i përfundojë.
Qysh në rini, Nuhiu ishte pjesë e veprimtarisë ilegale, duke u angazhuar në grupin “Flaka e Lirisë”, i cili vepronte në zonën e Gostivarit dhe më gjerë. Bashkëveprimtarët e kujtojnë si një person që kishte aftësi për të bashkuar njerëz të shtresave të ndryshme rreth qëllimeve të përbashkëta kombëtare.
Me vendosjen e pluralizmit politik në vend, ai vazhdoi angazhimin e tij publik dhe politik. Sipas bashkëveprimtarëve, moszgjidhja e çështjes kombëtare e shtyu atë të përfshihet edhe në përgatitjet për konfliktin e vitit 2001, ku gjatë luftës së udhëhequr nga Ushtria Çlirimtare Kombëtare (UÇK) ishte i angazhuar në strukturat e logjistikës dhe më pas në kundërzbulim për rajonin e Pollogut.
Edhe pas nënshkrimit të Marrëveshjes së Ohrit, ai mbeti aktiv në jetën politike dhe shoqërore, duke vazhduar të angazhohet në çështjet që lidhen me të drejtat dhe pozicionin e shqiptarëve.
Dy vite pas vdekjes së tij, familjarë, miq dhe bashkëveprimtarë e kujtojnë Kadir Nuhiun si një figurë të përkushtuar ndaj idealit kombëtar dhe si një aktivist që la gjurmë në veprimtarinë politike dhe shoqërore në rajon. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
