Ali Ahmeti dhe Arben Taravari urojnë mësuesit shqiptarë për 7 Marsin
Botuar nga Flaka
Liderë të partive politike shqiptare nga koalicioni AKI, kanë uruar mësimdhënësit me rastin e 7 Marsit – Ditës së Mësuesit, duke vlerësuar rolin e tyre në edukimin dhe ndërtimin e së ardhmes së shoqërisë.
Kryetari i Ali Ahmeti nga Bashkimi Demokratik për Integrim theksoi rëndësinë e arsimit në gjuhën shqipe dhe kontributin e mësimdhënësve ndër vite.
“Sot, në Ditën e Mësuesit – 7 Marsin, përkujtojmë me respekt dhe mirënjohje të gjithë mësimdhënësit, ata që me përkushtim, dije dhe sakrificë kanë ndërtuar themelet e arsimit dhe të ardhmes sonë kombëtare”, u shpreh Ahmeti.
Ai shtoi se arsimi shqip ka qenë gjithmonë shtylla e identitetit dhe zhvillimit kombëtar, duke nënvizuar se sot ekzistojnë tre universitete në gjuhën shqipe që po forcohen dhe po nxjerrin kuadro cilësore.
“Si subjekt politik kemi punuar për të ruajtur dhe përforcuar dinjitetin e këtij profesioni fisnik, mësimdhënies. Një ndër prioritetet tona ka qenë përmirësimi i statusit të mësimdhënësve, përmes rritjes së pagave në arsimin fillor, të mesëm dhe të lartë”, theksoi ai, duke shtuar se investimet në arsim duhet të vazhdojnë edhe më tej.
Ndërkohë, kryetari i Arben Taravari nga Aleanca për Shqiptarët vlerësoi profesionin e mësuesit si më të rëndësishmin në shoqëri.
“Nuk ka dhe nuk gjej profesion më të rëndësishëm se ai i mësimdhënësit. Secili profesion tjetër fillon nga duart e tyre. Faleminderit mësues të dashur, gëzuar 7 Marsin!”, shkroi Taravari në urimin e tij.
7 Marsi shënon Ditën e Mësuesit për shqiptarët, në përkujtim të hapjes së shkollës së parë shqipe në Korçë në vitin 1887. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
