Pretendojnë të udhëheqin shqiptarët, por veprimtaria e tyre mbetet komunale
Botuar nga Flaka
Përbërja e re e kryesisë së koalicionit VLEN po nxit debat në opinionin publik, pasi drejtimi i këtij formacioni politik duket se është përqendruar kryesisht në dy qendra – Çair dhe Tetovë – ndërsa shumë qytete dhe vendbanime të tjera shqiptare mbeten jashtë përfaqësimit në nivelin më të lartë, shkruan Gazeta Flaka
Sipas përbërjes së publikuar, VLEN do të drejtohet nga bashkëkryetarët Izet Mexhiti dhe Bilall Kasami, ndërsa në kryesi janë nënkryetarët Ilir Demiri dhe Bekim Qoku, si dhe sekretari i përgjithshëm Bekim Sali.
Kjo përbërje ka nxitur kritika se dy figurat kryesore të koalicionit, Mexhiti dhe Kasami, edhe pse pretendojnë të udhëheqin politikën e madhe shqiptare në Maqedonia e Veriut, në praktikë mbeten të lidhur kryesisht me çështje komunale. Izet Mexhiti është kryetar i komunës së Çair, ndërsa Bilall Kasami drejton komunën e Tetovë.
Ndërkohë, analiza e përfaqësimit territorial tregon se nga kryesia e re mungojnë përfaqësues nga shumë zona të tjera shqiptare, si Kumanovë, Gostivar, Dibër, Strugë dhe Kërçovë.
Pa përfaqësim në këtë strukturë mbeten edhe një sërë komunash dhe vendbanimesh shqiptare përreth Shkup, si Haraçinë, Saraj dhe Likovë, si dhe qytete në jug të vendit me komunitet shqiptar, përfshirë Manastir, Resnjë dhe Prilep.
Kjo ka shtuar perceptimin se drejtimi i VLEN-it është i përqendruar në dy baza politike lokale, ndërsa hapësira më e gjerë shqiptare në vend mbetet jashtë vendimmarrjes.
Debati u intensifikua edhe pas vizitës së krerëve të koalicionit në Prishtinë, ku u takuan me kryeministrin e Kosovës Albin Kurti, pas homazheve në Prekaz, në konakun e familjes së komandantit legjendar Adem Jashari.
Megjithatë, kritikat në opinionin publik po përqendrohen gjithnjë e më shumë te fakti se një koalicion që pretendon të përfaqësojë gjithë shqiptarët në vend, aktualisht duket i përqendruar kryesisht në dy qendra lokale politike – Çair dhe Tetovë. Gazeta Flaka
Botuar nga Flaka
2,8 miliardë euro në bixhoz: simptomë e një shoqërie në pasiguri – Çfarë flet sociologjia për fenomenin?
