Imrane Veliu Aliu nga BDI: “Masterplani” për Çarshinë u zëvendësua me skema asfaltimi”

Nga Bashkimi Demokratik për Integrim (BDI) – dega Çair, Imrane Veliu Aliu ka reaguar ashpër lidhur me projektin për Çarshinë e Shkupit, duke thënë se premtimet për një “masterplan” janë degraduar në ndërhyrje të pjesshme dhe të diskutueshme në terren, raporton Gazeta Flaka.

“Dje pamë se si një ‘masterplan’, i promovuar me bujë para zgjedhjeve, u degradua në zëvendim të disa kalldrëmeve e gjysma e të cilave përfundon me asfalt”, deklaroi Veliu Aliu.

Sipas saj, projekti që duhej të ruante identitetin e Çarshisë është shndërruar në improvizim që “cenon vlerën historike dhe kulturore” të saj.

Ajo ngriti dyshime edhe për procesin e prokurimit publik, duke përmendur kompaninë “Lendi Grup”, e themeluar në vitin 2024, e cila sipas saj ka filluar të fitojë tenderë me vlera të larta menjëherë pas krijimit.

“Nuk kemi të bëjmë me një kompani me histori të gjatë, referenca të dëshmuara apo përvojë shumëvjeçare në projekte të këtij niveli. Megjithatë, ajo shfaqet si fituese e njëpasnjëshme në një numër të madh komunash të drejtuara nga VMRO-DPMNE”, tha ajo.

Veliu Aliu shtoi se në disa raste vlera e parashikuar e tenderëve përputhet “në mënyrë të çuditshme me ofertën fituese”, duke thelluar dyshimet për procesin.

“Qytetarët kanë të drejtë të pyesin: pse një kompani e sapokrijuar bëhet kaq shpejt aktor dominues? Kush e favorizon? Dhe pse pikërisht këto kompani lidhen vazhdimisht me të njëjtin rreth politik? A po e paguan Çairi borxhin ndaj VMRO-DPMNE-së për mbështetjen zgjedhore?”, u shpreh ajo.

BDI nga Çairi kërkon transparencë të plotë për të gjitha kontratat e kompanisë “Lendi Grup”, për kriteret e përzgjedhjes dhe mënyrën e realizimit të projekteve, duke theksuar se “paratë publike nuk janë për eksperimente dhe as për shpërblime politike”.

“Çairi është i qytetarëve”, përfundoi reagimi. Gazeta Flaka