Diana Toska ironizon VLEN-in: “Një karrige me dy prapanica”

Vendimi i VLEN-it për të formalizuar drejtimin e përbashkët me dy kryetarë ka nxitur reagime dhe ironi në opinionin publik. Mes komenteve më thumbuese ka qenë ai i Diana Toskës, e cila përmes një reagimi publik e ka cilësuar këtë formulë si një kompromis absurd të ndërtuar mbi pazare politike dhe luftë egosh.

“VLEN-i më në fund u bashkua. Pesë kryetarë u mblodhën me e ndërtu ‘partinë e madhe’, por i gjithë halli ishte: sa prapanica i nxë një karrige”, shkruan Toska.

Ajo ironizon mënyrën se si, sipas saj, përplasjet për lidershipin përfunduan me një zgjidhje të pazakontë.

“Dhe në këtë luftë egosh, pasi nuk u morën vesh kush me u ul i pari, shpikën ‘zgjidhjen historike’: dy kryetarë për një karrige”, thekson ajo.

Sipas Toskës, simbolika bëhet edhe më e fortë për faktin se ky vendim u shpall pikërisht më 9 Maj, Ditën e Europës.

“Madje këtë farsë e shpallën solemnisht në Ditën e Europës, duke i tregu edhe Europës se deri ku mund të shkojë pazari politik te ne”, shprehet ajo.

Në reagimin e saj, Toska paralajmëron se sfidat e vërteta për koalicionin ende nuk kanë nisur.

“Tash fillon filmi i vërtetë. Kur të fillojë shtyrja mes dy prapanicave kush me mbet më gjatë në karrige… interesant po duket ky unitet”, ironizon ajo.

Ajo ngre pikëpyetje edhe për figurat që kanë mbetur jashtë strukturës së re politike.

“Po edhe më interesante do të jetë, çka do të bëjnë disa që janë në pritje, e disa të tjerë të eliminuar… që nuk janë përfshirë në këtë koalicion të prapanicave”, shton Toska.

Në fund, ajo e mbyll reagimin me një pyetje thumbuese që po qarkullon gjerësisht në rrjetet sociale:

“Si urohet një karrige me dy prapanica? ‘U trashëgofshi’… apo ‘mos u rrëzofshi’?”

Deklarata e saj vjen në një moment kur VLEN po përballet me kritika të shumta dhe largime nga strukturat e diasporës, duke e kthyer debatin për modelin e ri drejtues në një nga temat më të komentuara në skenën politike shqiptare në Maqedoninë e Veriut. Gazeta Flaka