Ademi për protestën studentore: Çështja është nëse shteti do ta zbatojë ligjin ose jo

Sekretari i Përgjithshëm i BDI-së, Arbër Ademi, ka deklaruar se protesta e studentëve për gjuhën shqipe është e drejtë ligjore dhe se përfaqësuesit e VLEN-it duhet të dalin me zgjidhje konkrete, e jo me arsyetime politike.

Në emisionin “Debat në Shenja”, Ademi komentoi edhe reagimet për mungesën e himnit shqiptar në kongresin e VLEN-it, duke theksuar se në kongreset e BDI-së himni kombëtar është respektuar gjithmonë.

“E keni parë se çdoherë kur Izet Mexhiti ka qenë në kongres të BDI-së i është ngritur në këmbë himnit kombëtar”, deklaroi Ademi.

Ai shtoi se edhe në kongresin e fundit të BDI-së është prezantuar një video-material për rrugëtimin e shqiptarëve në Maqedoninë e Veriut, nga periudha para vitit 2001 deri te zgjedhja e kryeministrit shqiptar.

Sa i përket çështjes së provimit të jurisprudencës në gjuhën shqipe, Ademi akuzoi ministrin e Drejtësisë, Igor Fillkov, se po tallet me përfaqësuesit shqiptarë në qeveri.

Sipas tij, ideja për ta zgjidhur problemin me një ligj të ri nënkupton “me ia bërë varrin Ligjit për gjuhën shqipe”.

Ademi tha se ligji ekzistues garanton përdorimin e gjuhës shqipe në institucionet shtetërore, por problemi mbetet moszbatimi në praktikë.

“Deri sot nuk është mbajtur në gjuhën shqipe provimi i jurisprudencës. Por a do të thotë kjo se kur asnjëherë të mos mbahet kur ligji e garanton?”, tha ai.

Ai përmendi edhe fusha të tjera ku, sipas tij, gjuha shqipe ende nuk zbatohet siç duhet, përfshirë shkresat e noterëve, avokatëve, përmbaruesve dhe dokumentacionin mjekësor.

“Çështja thelbësore është nëse studentët kanë të drejtë ligjore apo jo. Ligji për gjuhët ka formulime brilante që përcaktojnë se në të gjitha institucionet shtetërore gjuha shqipe është gjuhë zyrtare”, deklaroi Arbër Ademi. Gazeta Flaka