Takimi Mickoski–VLEN para protestës ngre më shumë pyetje se përgjigje

 orë para protestës së paralajmëruar të studentëve shqiptarë në Shkup, kryeministri i Maqedonisë së Veriut, Hristijan Mickoski, zhvilloi takim pune me bashkëkryetarët e VLEN-it, Bilall Kasami dhe Izet Mexhiti, ku në fokus ishte çështja e përdorimit të gjuhëve gjatë dhënies së provimit të Jurisprudencës.

Sipas komunikatës së Qeverisë, institucionet “po punojnë në mënyrë aktive për të gjetur zgjidhje” në përputhje me Kushtetutën dhe Ligjin për Përdorimin e Gjuhëve.

Por reagimet pas takimit kanë ngritur dilema të forta në opinionin publik: pse kërkohen “zgjidhje të reja”, kur Ligji për Përdorimin e Gjuhëve tashmë e garanton përdorimin e gjuhës shqipe në institucionet shtetërore dhe procedurat administrative?

Ish-ministri i Jashtëm, Bujar Osmani, reagoi duke theksuar se zgjidhja ekziston në Ligjin për Gjuhët, konkretisht në nenin 23, alineja 5, dhe se problemi nuk është mungesa e bazës ligjore, por mungesa e vullnetit për ta zbatuar atë.

“Nuk ka nevojë të kërkohet zgjidhje. Zgjidhja ekziston në Ligjin për Gjuhët. Duhet vetëm të implementohet”, deklaroi Osmani, duke akuzuar pushtetin për tentim të fragmentimit të përdorimit të gjuhës shqipe.

Në të njëjtën linjë reagoi edhe analisti Sefer Selimi, i cili tha se “zgjidhjen e kanë në Ligj, mungon vullneti dhe takati politik”, duke bërë thirrje për pjesëmarrje në protestën e studentëve me moton “#MeStudentët”.

Takimi është komentuar gjerësisht edhe për mungesën e ministrit të Drejtësisë, Igor Fillkov, institucioni që lidhet drejtpërdrejt me problemin dhe që në opinion po shihet si një nga përgjegjësit kryesorë për situatën e krijuar.

Në komunikatën zyrtare nuk u dhanë detaje konkrete, afate apo vendim i qartë nëse studentët shqiptarë do ta kenë menjëherë të drejtën për ta dhënë provimin e Jurisprudencës në gjuhën shqipe.

Kjo ka forcuar bindjen te shumë qytetarë se çështja e gjuhës shqipe vazhdon të trajtohet si temë për menaxhim politik, e jo si e drejtë themelore e garantuar me ligj. Gazeta Flaka