Ademi: Policia dhunoi dhe mori peng studentin nga Tirana

Sekretari i Përgjithshëm i Bashkimit Demokratik për Integrim (BDI), Arbër Ademi, ka lëshuar akuza të rënda ndaj qeverisë së Maqedonisë së Veriut, duke e cilësuar situatën aktuale si një “shkërmoqje dhe masakrim total” të Marrëveshjes Paqësore të Ohrit.

Gjatë një interviste në “Përballë Lajmit” në Klan News me gazetarin Besard Jacaj, Ademi komentoi protestën e studentëve në Shkup për gjuhën shqipe, duke deklaruar se Ministri i Drejtësisë po shkel ligjin me të dyja këmbët duke refuzuar zbatimin e gjuhës shqipe.

Përtej përplasjeve institucionale, sekretari i BDI-së hodhi dritë mbi një incident, duke përgënjeshtruar versionin zyrtar të autoriteteve rreth ndalimit të studentëve nga Shqipëria.

Sipas Ademit, studentët nuk u devijuan për të shmangur përplasjet me tifozët maqedonas, por u morën peng dhe u orientuan qëllimisht gabim nga policia për t’u penguar pjesëmarrja në protestë, ku madje njëri prej tyre u tërhoq zvarrë nga uniformat blu.

Arbër Ademi: Ka prej dy vitesh që në mënyrë aktive studentët e kërkojnë këtë të drejtë ligjore dhe këtu ka patur një kakofoni të qeverisë. Ata thoshin nuk kanë të drejtë ligjore studentët, dilnin të nesërmen dhe thoshin që studentët kanë të drejtë ligjore. Shikoni sot ministrin e Drejtësisë, se çfarë ka deklaruar, edhe pas atij takimi. Ai i ka nxjerrë zbuluar ka thënë “asnjëherë nuk do i lejoj me këtë Kushtetutë dhe me këtë kornizë ligjore zbatimin e gjuhës shqipe”, gjë që nuk ka të drejtë. Institucioni shtetëror, i quajtur inspektorat për zbatimin e gjuhëve, ka konstatuar që ky ministër po e shek. Ligjin me të dyja këmbët. Bëjnë sikur nuk dëgjojnë dhe nuk shikojnë, bëhen të shurdhën ndaj kërkesave të studentëve. Nuk është provimi i jurispudencës në pyetje.  Studentët sot nuk po kërkojnë vetëm provimin e jurisprudencës, ajo, ajo çështje ju takon me ligj, por ata janë çuar në këmbë edhe ndaj Gjykatës Kushtetuese, të cilën ata e cilësojnë si gjykatë politike të Maqedonisë. Ajo që po ndodh në Maqedoninë e Veriut është shkërmoqje, masakrim dhe shfuqizim total i marrëveshjes paqësore të Ohrit.

Besard Jacaj: Sa u takon studentëve të parë që janë ndaluar Mexhiti tha që ka qenë vetëm një autobus me 20 studentë, të cilët nuk u ndaluan, sepse nuk do të lejoheshin tek protesta thjesht u shmang një përplasje me disa tifozë të një skuadre maqedonase.

Arbër Ademi: Nuk është e vërtetë! Studentët shqiptarë nga Shqipëria na kanë kontaktuar ne dhe na kanë dërguar lokacionin. Ajo ishte krejtësisht në një qytet tjetër, larg Shkupit. Ata po i orientonin gabim, kanë qenë vetëm 2 kilometra larg vendit ku duhet të mbahej protesta. Me qëllim e kanë bërë. Studentët e Shqipërisë do ua thonë vetë qëndrimin e  tyre, e kanë tërhequr zvarrë njërin prej tyre, vetëm sepse u ka kërkuar që të ndalojnë dhe të mos i dërgojnë në atë destinacion. Janë marrë peng nga policia vetëm e vetëm, që të mos arrijnë në destinacionin e duhur.