Skandal spiunazhi në Presidencë – A “këndon” edhe Stoiljkoviq në Beograd e Moskë?!

Në kohën kur institucionet më të larta shtetërore në Maqedonia e Veriut po përballen me dyshime serioze për rrjedhje të të dhënave konfidenciale dhe infiltrime në sistemin presidencial, opinionit publik po i shtohen pyetje të reja edhe për sigurinë e kabinetit qeveritar dhe ndikimet e huaja në strukturat shtetërore.

Pas raportimeve për parahetimin që po zhvillohet ndaj aktiviteteve të dyshuara në Kabinetin e presidentes Gordana Siljanovska-Davkova, në fokus të debatit publik kanë hyrë edhe figurat politike me lidhje të hapura pro-ruse dhe pro-serbe brenda qeverisë së Hristijan Mickoski.

Një nga emrat më të përfolur është Ivan Stoiljkoviq, i cili mban pozitën e zëvendëskryeministrit dhe ministrit për marrëdhënie ndërmjet komuniteteve. Stoiljkoviq prej kohësh njihet për qëndrimet e tij të afërta me politikën zyrtare të Serbia dhe lidhjet e hapura me qarqe politike pro-ruse.

Debati është intensifikuar sidomos pas publikimeve mbi lidhjet e vajzës së tij me Fondacioni Gorchakov, organizatë e krijuar me dekret presidencial nga autoritetet e Federata Ruse dhe nën mbikëqyrjen e Ministrisë së Jashtme ruse.

Sipas të dhënave publike, Sandra Stoiljkoviq ka rol koordinues në këtë fondacion dhe merr pjesë në aktivitetet e tij rajonale, përfshirë “Balkan Dialogue”, platformë ku promovohen lidhjet strategjike të Ballkanit me Rusinë. Kritikët e konsiderojnë këtë rrjet si instrument të ndikimit rus në rajon përmes diplomacisë publike, mediave dhe rrjeteve politike.

Në opinion po shtrohen pyetje nëse një qeveri që përfshin figura me lidhje të tilla politike dhe ideologjike mund të garantojë mbrojtjen e plotë të interesave shtetërore dhe të informacionit të ndjeshëm institucional, veçanërisht në një moment kur vetë Presidenca po përballet me dyshime për infiltrime dhe rrjedhje të të dhënave.

Diskutimet janë shtuar edhe pas takimit të fundit të Milorad Dodik me Stoiljkoviqin, ku është folur për bashkëpunimin rajonal të komunitetit serb, takim që për kritikët dëshmon afërsinë politike të zëvendëskryeministrit me boshtin politik Beograd–Banja Luka–Moskë.

Megjithatë, deri tani nuk ekzistojnë prova publike apo hetime zyrtare që lidhin Stoiljkoviqin me rrjedhje informacioni apo aktivitete të paligjshme. Por zhvillimet e fundit kanë shtuar shqetësimet për ndikimet e huaja në institucionet shtetërore dhe kanë hapur debat të gjerë mbi sigurinë kombëtare, besueshmërinë institucionale dhe orientimin gjeopolitik të vendit. Gazeta Flaka