BE, një hap drejt fundit të vetos? 11 shtete kërkojnë ndryshimin e rregullave

Një grup prej 11 shtetesh anëtare të Bashkimit Evropian po kërkon ndryshime në mënyrën se si BE-ja merr vendime për politikën e jashtme dhe të sigurisë, me synimin për të shmangur bllokimin e vendimeve nga vetoja e një shteti të vetëm.

Në një dokument të përbashkët drejtuar përfaqësueses së lartë të BE-së për Politikën e Jashtme dhe Sigurinë, Kaja Kallas, 11 vendet propozojnë që Unioni të shqyrtojë më shumë mundësinë e kalimit nga unanimiteti në votimin me shumicë të kualifikuar, të paktën në raste të caktuara.

Në mesin e nënshkruesve janë Franca, Gjermania, Spanja, Suedia dhe Rumania, si dhe Austria, Belgjika, Danimarka, Finlanda, Luksemburgu dhe Holanda.

Aktualisht, politika e jashtme e BE-së në përgjithësi mbështetet në parimin e unanimitetit, që i jep secilit prej 27 shteteve mundësinë të bllokojë një vendim. Pikërisht kjo është parë si një nga dobësitë e Unionit në përballje me krizat ndërkombëtare, pasi një shtet i vetëm mund të pengojë një qëndrim të përbashkët të 26 vendeve të tjera.

Në dokumentin e tyre, 11 vendet kërkojnë gjithashtu përdorim më të madh të “abstenimit konstruktiv”, shmangien e lidhjes së vendimeve të politikës së jashtme me çështje të tjera dhe shqyrtimin e mundësive që ofrojnë traktatet e BE-së për kalimin në shumicë të kualifikuar.

Ndryshimi do të kishte rëndësi të madhe politike: BE-ja do të mund të merrte vendime edhe kur një apo disa shtete nuk pajtohen, duke e bërë Unionin më të shpejtë në reagimin ndaj krizave dhe më pak të varur nga vetoja kombëtare. Por kundërshtarët paralajmërojnë se një ndryshim i tillë mund të dobësojë të drejtën e shteteve më të vogla për të mbrojtur interesat e tyre kombëtare.

Vetë Kallas ka argumentuar më herët se unanimiteti mund ta ngadalësojë BE-në dhe se vetoja e një shteti nuk duhet të përcaktojë politikën e të gjithë Unionit.

Debati tashmë është hapur: a duhet BE-ja të mbetet një union ku të 27 shtetet duhet të bien dakord për politikën e jashtme, apo të bëhet më e aftë për të vepruar edhe kur një shtet thotë “jo”? Gazeta Flaka