Rama dhe Kurti reagojnë për Hagën: kritika ndaj aktgjykimit dhe apel për Kosovën

Kryeministri i Shqipërisë, Edi Rama, dhe kryeministri i Kosovës, Albin Kurti, kanë reaguar ndaj aktgjykimit të Dhomave të Specializuara në Hagë ndaj ish-krerëve të UÇK-së, duke shprehur kritika për zhvillimet dhe duke theksuar rëndësinë e qëndrimit institucional ndaj procesit.

Gjatë një takimi me komunitetin shqiptar në Michigan, në kuadër të vizitës së tij në Shtetet e Bashkuara, Rama e përshkroi situatën si “një mort për së gjalli” dhe “një varrosje njerëzish të gjallë”. Ai tha se respektimi i vendimeve gjyqësore është i padiskutueshëm, por sipas tij kjo nuk nënkupton heshtje ndaj tyre.

“Problemi në këtë rast nuk është të mos respektosh vendimin e Gjykatës, po problemi është si ta refuzosh varrosjen për së gjalli të katër njerëzve në emër të popullit, kur vetë populli nuk e gjen asgjëkund veten në atë vendim”, deklaroi Rama.

Ai shtoi se Shqipëria mund të qëndrojë në krah të Kosovës, ndërsa mënyrën e kundërshtimit politik dhe publik të zhvillimeve në Hagë duhet ta përcaktojnë përfaqësuesit e zgjedhur të Kosovës.

Në të njëjtin takim, Rama njoftoi edhe hapjen e Konsullatës së Përgjithshme të Shqipërisë në Detroit, një kërkesë e përsëritur e komunitetit shqiptar në Michigan.

Ndërkohë, në Nju-Jork, Albin Kurti u takua me kongresistin amerikan Mike Lawler, me të cilin diskutoi edhe aktgjykimin e Dhomave të Specializuara. Kurti e cilësoi vendimin “të padrejtë” dhe tha se ai përmban, sipas tij, pasaktësi faktike e historike dhe gabime ligjore, të cilat duhet të adresohen në procedurën e apelit.

Kurti u ndal veçanërisht te pretendimet për të ashtuquajturën “Shtëpia e Verdhë” dhe trafikimin e organeve, duke theksuar se këto pretendime nuk u përfshinë në aktakuzën ndaj Hashim Thaçit dhe bashkëakuzuarve.

Më 16 shtator 2026, trupi gjykues i Dhomave të Specializuara i shpalli Thaçin, Kadri Veselin, Rexhep Selimin dhe Jakup Krasniqin fajtorë për krimet e luftës të ndalimit/arrestimit të paligjshëm ose arbitrar, trajtimit mizor, torturës dhe vrasjes. Thaçi dhe Krasniqi u dënuan me nga 25 vjet burgim, Veseli me 18 vjet, ndërsa Selimi me 13 vjet. Në të njëjtin aktgjykim, të katër u shpallën të pafajshëm për gjashtë akuzat për krime kundër njerëzimit.

Aktgjykimi është i shkallës së parë dhe mund të apelohet.

Reagimet e Ramës dhe Kurtit vijnë në një moment kur aktgjykimi ka rikthyer në qendër të debatit publik në Kosovë dhe Shqipëri çështjen e përgjegjësisë individuale penale, interpretimit të luftës së UÇK-së dhe rolit të Dhomave të Specializuara. Gazeta Flaka