“Kafe në Gostivar”, Taravari mbledh deputetët dhe kryetarët e komunave të ASH-së

Kryetari i Aleancës për Shqiptarët, Arben Taravari, ka zhvilluar një takim në Gostivar me deputetë dhe kryetarë komunash nga radhët e ASH-së, në një moment kur në opinion kanë qarkulluar zëra për kalimin e disa drejtuesve të partisë në koalicionin VLEN.

Taravari ka publikuar në rrjetet sociale një fotografi nga takimi, ku shihen kryetari i Komunës së Gostivarit, Valbon Limani, kryetari i Komunës së Vrapçishtit, Isen Shabani, deputeti Halil Snopçe, si dhe Rijat Shaqiri dhe Sadik Sulejmani.

“Kafe në Gostivar”, ka shkruar Taravari në mesazhin e publikuar së bashku me fotografinë.

Takimi vjen pas spekulimeve të ditëve të fundit se dy kryetarë komunash nga radhët e Aleancës për Shqiptarët mund të kalojnë në VLEN.

Megjithatë, zërat për ndryshime politike janë mohuar publikisht. Më herët, Taravari ka deklaruar se informacionet për largimin e Isen Shabanit nga ASH-ja dhe kalimin e tij në VLEN nuk janë të vërteta.

Ndërkohë, edhe prania e Valbon Limanit në takimin e zhvilluar në Gostivar, përkrah drejtuesve të tjerë të ASH-së, dërgon një mesazh të qartë politik në kohën kur në opinion po qarkullojnë spekulime për lëvizje dhe rreshtime të reja brenda skenës politike shqiptare.

Fotografia e publikuar nga Taravari duket se synon pikërisht të shuajë dilemat dhe të përforcojë mesazhin e unitetit brenda strukturave të Aleancës për Shqiptarët: deputetët dhe kryetarët e komunave të përfolur për lëvizje politike janë shfaqur së bashku në të njëjtën tryezë.

Mbetet të shihet nëse ky takim do t’u japë fund përfundimisht spekulimeve për kalime në VLEN, por mesazhi vizual nga Gostivari është i qartë: drejtuesit e ASH-së që janë përfolur në opinion publik janë rreshtuar përkrah Arben Taravarit. Gazeta Flaka