91% e amvisërive kanë internet, qytetarët paralajmërojnë për përdorimin e tepruar
Botuar nga Flaka
Interneti është bërë pjesë e pandashme e jetës së qytetarëve në Maqedoninë e Veriut. Të dhënat statistikore tregojnë se rreth 94 për qind e popullsisë së moshës 15 deri në 74 vjeç e përdor internetin, ndërsa 82 për qind e shfrytëzojnë atë disa herë gjatë ditës.
Sipas të dhënave të Entit Shtetëror të Statistikave, të cilave u referohet Alsat, përdorimi i internetit është bërë rutinë e përditshme për shumicën e qytetarëve. Megjithatë, disa prej tyre shprehin shqetësim për kohën e kaluar online dhe ndikimin që kjo mund të ketë në komunikimin dhe shoqërimin, veçanërisht te fëmijët dhe të rinjtë.
Qytetarët e anketuar nga Alsat pranojnë se interneti është i nevojshëm, por theksojnë se përdorimi i tepruar mund t’i largojë njerëzit nga komunikimi i drejtpërdrejtë.
“Fëmijët më nuk dinë të bisedojnë, vetëm shohin internet dhe ajo është kënaqësia kryesore”, u shpreh një qytetare, duke shprehur shqetësimin për kohën që fëmijët kalojnë në internet.
Një qytetar tjetër tha se preferon të kalojë kohë duke ecur dhe jo duke qëndruar gjatë në shtëpi para internetit. Sipas tij, të rinjtë duhet t’i kushtojnë më shumë rëndësi shoqërimit dhe aktiviteteve jashtë ekranit.
Edhe qytetarë të tjerë vlerësojnë se interneti duhet të përdoret sipas nevojës, duke theksuar rëndësinë e angazhimeve dhe aktiviteteve të tjera në jetën e përditshme.
Nëntë nga dhjetë amvisëri kanë qasje në internet
Të dhënat e Entit Shtetëror të Statistikave për tremujorin e parë të këtij viti tregojnë se 91 për qind e amvisërive në nivel shtetëror kanë qasje në internet.
Ndërkohë, rreth 94 për qind e popullsisë e përdorin internetin për telefonata, ndërsa afërsisht 89 për qind shkëmbejnë mesazhe përmes aplikacioneve që funksionojnë në internet.
Shifrat dëshmojnë se interneti ka një rol të rëndësishëm në komunikimin e përditshëm dhe në jetën familjare e shoqërore. Sfida mbetet përdorimi i tij në mënyrë të ekuilibruar, në mënyrë që komunikimi online të mos zëvendësojë plotësisht kontaktin e drejtpërdrejtë mes njerëzve.
Burimi: Alsat / Enti Shtetëror i Statistikave
Botuar nga Flaka
Shkollat po mbyllen, fshatrat po zbrazen: alarmi demografik në Maqedoninë e Veriut
BALLKANI SOT
