Toshkovski paralajmëron revolucion në trafik: Kamera mobile në pikat e zeza dhe radarë në veturat policore

Ministria e Punëve të Brendshme planifikon ta zgjerojë projektin “Safe City” me kamera mobile për kontrollin e shpejtësisë, si dhe me pajisje të instaluara në automjetet policore, të cilat do të mund të regjistrojnë kundërvajtje në trafik edhe gjatë lëvizjes. Këtë e bëri të ditur sot në një konferencë për media ministri i Punëve të Brendshme, Pançe Toshkovski.

Ai theksoi se analizat e deritanishme kanë treguar se vendosja e kamerave vetëm në lokacione të paracaktuara nuk do të kishte efekt të mjaftueshëm parandalues. Qëllimi është që drejtuesit e automjeteve të jenë të vetëdijshëm se mund të zbulohen në rast të shkeljes së rregullave të trafikut, pavarësisht vendit ku qarkullojnë.

Sipas propozimeve të ekspertëve, automjetet ekzistuese policore duhet të pajisen me kamera që do të matin shpejtësinë e automjeteve edhe gjatë lëvizjes. Paralelisht, është planifikuar edhe blerja e kamerave mobile, të cilat do të vendosen në të ashtuquajturat pika të zeza, përkatësisht në lokacionet ku ndodhin më shpesh aksidente trafiku me viktima dhe persona të lënduar rëndë.

Toshkovski tha se do të punohet në identifikimin e të gjitha pikave kritike të trafikut në vend, si në zonat urbane, ashtu edhe në rrugët magjistrale dhe ekspres.

Ministri paralajmëroi gjithashtu se sistemi “Safe City” gjatë javës së parë të dhjetorit do të fillojë zyrtarisht të zbatohet edhe në territorin e SPB Strumicë.

Më pas në radhë është SPB Shtip, ku aktivitetet pritet të përfundojnë deri në fund të vitit. Pas saj, mbetet edhe territori i SPB Manastir, për mbulimin e të cilit do të nevojiten më së shumti një muaj deri në një muaj e gjysmë.

Toshkovski pret që deri në shkurt sistemi “Safe City” të vendoset në të gjithë territorin e Maqedonisë.

Duke iu përgjigjur kritikave ndaj projektit, ministri u bëri thirrje qytetarëve të kenë parasysh se gjatë 15 viteve të fundit, më shumë se 2.000 persona kanë humbur jetën në aksidente trafiku.

Ai theksoi se aktivitetet për rritjen e sigurisë në komunikacion nuk do të përfundojnë me vendosjen e kamerave, por do të vazhdojnë edhe me masa të tjera që synojnë parandalimin e kundërvajtjeve dhe uljen e numrit të aksidenteve. Gazeta Flaka

• 
• 
• 
• 
• 
• 
• 

32

„Duke pasur parasysh protestat në shtetet e rajonit dhe të botës, a mendoni se edhe Maqedonia e Veriut do të përfshihet në këtë valë të protestave sociale?“

Po, është koha.

24

Jo, nuk mendoj.

7

Nuk ka arsye për të protestuar.

1