Sofja i përgjigjet Shkupit: Dialogu për BE-në duhet të zhvillohet në kuadër të institucioneve evropiane

Bullgaria i është përgjigjur kërkesës së Maqedonisë së Veriut që Bashkimi Evropian të përfshihet në bisedimet e ardhshme mes Shkupit dhe Sofjes, duke theksuar se procesi i anëtarësimit në BE duhet të zhvillohet përmes institucioneve dhe procedurave të Unionit.

Reagimi i Ministrisë së Jashtme bullgare vjen pas deklaratës së ministrit të Jashtëm dhe Tregtisë së Jashtme të RMV-së, Timço Mucunski, i cili tha se Shkupi kërkon që në çdo bisedim të ardhshëm me Bullgarinë të ketë edhe përfaqësim të BE-së, qoftë përmes institucioneve evropiane apo shteteve anëtare.

Nga Sofja thonë se Bullgaria mbetet e hapur për dialog konstruktiv me Maqedoninë e Veriut, ndërsa theksojnë se marrëdhëniet e fqinjësisë së mirë janë pjesë e procesit të integrimit evropian. Ministria bullgare pret që Shkupi të përmbushë angazhimet e marra dhe të ndërmarrë ndryshimet e nevojshme për avancimin e procesit të integrimit.

Mucunski, ndërkohë, ka deklaruar se Maqedonia e Veriut dëshiron të vazhdojë rrugën drejt BE-së, por nuk është e gatshme të pranojë një kompromis që, sipas tij, nuk i garanton vendit mjaftueshëm parashikueshmëri. Ai ka përmendur gjithashtu një “mungesë fundamentale të besimit” mes Shkupit dhe Sofjes.

Qëndrimi i Sofjes është në linjë me pozicionet e saj të mëparshme se zbatimi i angazhimeve të përcaktuara në Konsensusin Evropian të korrikut 2022 është pjesë kyçe e rrugës së Maqedonisë së Veriut drejt anëtarësimit.

Përplasja e re diplomatike tregon se, pavarësisht gatishmërisë së deklaruar për dialog, dallimet mes dy vendeve lidhur me mënyrën e zhvillimit të procesit eurointegrues mbeten të hapura. Gazeta Flaka