Mbi 6.3 milionë të huaj vizituan Shqipërinë për shtatë muaj

Numri i shtetasve të huaj që kanë hyrë në territorin shqiptar gjatë muajit korrik të këtij viti shënoi rritje me 2.7 %, krahasuar me korrikun e viti 2023, duke arritur në 1 milionë e 818 mijë e 378.

Sipas raportit të publikuar nga INSTAT, mbi lëvizjet e shtetasve rezulton se gjatë muajit korrik të këtij viti të kenë hyrë në territorin e Shqipërisë 2 milionë e 624 mijë e 207 shtetas shqiptarë dhe të huaj.

Në total, janë 10.7 milionë shtetas që kanë hyrë në Shqipëri gjatë periudhës janar-korrik, ndër ta, të huaj janë regjistruar 6.3 milionë, të cilët kanë deklaruar se arsyeja e vizitës në Shqipëri është për pushime.

Në krahasim me periudhën janar-korrik të një viti më parë numri i shtetasve të huaj që kanë hyrë në Shqipëri shënoi rritje me 23.2 %.

Referuar raportit, 95 % e hyrjeve të shtetasve të huaj në Shqipëri janë nga rajoni i Evropës. Evropa Jugore zë 71 % të hyrjeve të shtetasve të huaj nga kontinenti europian, ndjekur nga Europa Qendrore/Lindore me 10 %.

Qëllimi i hyrjes në territorin shqiptar i shtetasve të huaj, në 99 % të rasteve është për qëllime personale, ku dominojnë hyrjet për pushime, vizitë tek të afërm, etj. Ky tregues ka shënuar një rritje me 3.7 %, krahasuar me korrikun e 2023-shit.

Rritje të ndjeshme në muajin korrik kanë pasur edhe hyrjet e shtetasve të huaj për qëllime biznesi dhe profesionale, me 50.9 %