Abetarja e unifikuar shqipe në duart e nxënësve të klasave të para

Nxënësit shqiptarë të klasave të para, sot për herë të parë e kanë pranuar abetaren e unifikuar shqipe, nga ku mund të mësojnë njësoj si bashkëmoshatarët e tyre në Shqipëri dhe Kosovë. Shpërndarja e abetares u bë nga përfaqësuesit e VLEN-it në pushtetin qendror dhe lokal në më shumë shkolla të vendit. Zëvendëskryeministri i parë Izet Mexhiti, tha se kjo abetare mes tjerash do të ruajë dhe kultivojë gjuhën standarde dhe të unifikuar shqipe.

“Sot, bashkë me arsimtarët, nxënësit dhe prindërit, bëjmë përurimin e abetares së unifikuar për nxënësit e klasës së parë. Kjo abetare shënon kurorëzimin e përpjekjeve tona për të mbrojtur trungun tonë identitar në erën e globalizimit dhe internetit. Në aspektin etno- kulturor, mund të thuhet se ajo e vulos përkatësinë tonë, ndërsa në aspektin praktik, abetarja e unifikuar paraqet një udhërrëfyes shumë të rëndësishëm, në mos esencial, për ruajtjen dhe kultivimin e gjuhës standarde dhe të unifikuar shqipe në dekadat që vijojnë përpara nesh”, tha Izet Mexhiti, Zëvendëskryeministër i parë.

Aktivitet të ngjashëm kishte edhe në Tetovë. Kreu i komunës Bilall Kasami tha se abetarja do të shpërndahet në të gjitha shkollat.

“Për momentin është shpërndarë dhe do të shpërndahet nga gjitha shkollat. Një informatë që të gjithë këto libra kanë qenë të deponuara në institutin e trashëgimisë kulturore dhe kanë qëndruar aty. Me ardhjen tonë në pushtet, këto libra shpërndahen tek nxënësit dhe do të jenë në dorë të nxënësve. Do të jetë vendimi i arsimtarëve se si do të shfrytëzohen ato. Unë besoj se edher arsimtarët edhe nxënësit mezi kanë pritur që të kenë këtë abetare në duart e tyre dhe unë besoj se ajo do të shfrytëzohet nga të gjithë nxënësit shqiptarë në Maqedoninë e Veriut”, u shpreh Bilall Kasami, Kryetar i komunës së Tetovës.

Abetarja e unifikuar shqipe është një çështje që është diskutuar tashmë një kohë të gjatë, por shpërndarja e saj bëhet për herë të parë. Abetaret janë donacion i ITKSHSHM-së. /Alsat.mk