Komisioni ligjvënës-juridik konstaton se Propozim-ligji për lojërat e fatit dhe lojërat zbavitëse është i papranueshëm

Me dy  vota “për”, dy “kundër” dhe asnjë abstenim, Komisioni ligjvënës i Kuvendit thekson se Propozimi i ligjit për ndryshimin dhe plotësimin e ligjit për lojërat e fatit dhe lojërat argëtuese në lexim të parë iniciuar nga deputetët e “Frontit Evropian” është i papranueshëm dhe nuk duhet të jepet për lexim të mëtejshëm.

Kryetari i Komisionit ligjvënës- juridik, Aleksandar Veljanovski, njoftoi se dje trupi punues amë, Komisioni për financim dhe buxhet, ka konstatuar se ky ligj nuk është i pranueshëm dhe nuk duhet të shqyrtohet tutje.

Një nga propozuesit, deputetja e “Frontit Evropian” Ilire Dauti, në sqarimin e zgjidhjes ligjore, theksoi se me ndryshimet, objektet e lojërave të fatit kërkohet të kryejnë aktivitetin vetëm në hotele me pesë yje.

“Nuk ka vend përreth shkollave, objekteve fetare dhe kulturore ku të mos ketë objekte të lojrave të fatit. Të gjithë duhet të shtiremi si shtet, që lumturia e njerëzve të jetë me punësim e gjëra të tjera që të kenë përfitime materiale, jo në këtë mënyrë. Pika e parë është për faktin se i gjithë problemi qëndron në atë se nuk ka kufizime në lidhje me këto aktivitete ku do të zhvillohen. Çdo objekt që është i lirë në territor mund të përdoret pa asnjë pengesë për këtë lloj aktiviteti të lojërave të fatit. Duke mos pasur kufizime të tilla, kemi ardhur në një situatë që mund të hapin kaq shumë objekte të tilla të lojrave të fatit dhe ka mendime që thonë se lojrat e fatit është më mirë të mos ekzistojnë fare. Kemi ardhur deri në zgjidhjen se është më mirë që ata të vendosen vetëm në hotele me pesë yje”, tha ajo.

Pika e dytë, siç theksoi Dautit, me hyrjen në fuqi të këtij ligji, organizatorët e lojërave të fatit në kazino, pika bastesh, klube automatike dhe lotari të tipit të mbyllur, reklama, njoftime dhe shpallje në vende publike si dhe për emërtimin e lokalit afarist, të paguajë shumën mujore prej 200 euro në denarë, ekuivalente për çdo m2 sipërfaqe në të cilën gjendet emri, shpallja, njoftimi, të cilat mjetet paguhen në llogari të veçantë të komunës në territorin e së cilës ndodhet objekti afarist. Mjetet e paguara nga organizatorët e lojërave të fatit, komunat duhet t’i përdorin për të mbështetur sportin dhe aktivitetet sportive të komunës, personat me nevoja të veçanta, organizatat me aftësi të kufizuara dhe shoqatat e qytetarëve për të luftuar dhunën në familje.

Pa asnjë sqarim, kryetari i Komisionit Veljanovski e ka tërhequr nga rendi i ditës së seancës Propozim- ligjin për shpalljen e kanionit të Matkës monument natyror, Propozim- ligjin për shpalljen e kënetês së Studençishtës si Park natyror, Propozim-ligjin për shpalljen e LiLiqenitë Ohrit si monument natyror, të tre në lexim të dytë.